ВАРЗИШ
Панҷшанбе 26 Май 2022 07:23
1040
Моҳру Ҳалимова шаш сол аст, ки барои парчами кишварро дар мусобиқаҳои байналмилалӣ парафшон кардан талош дорад. Вазнаш 73, қадаш 1 метру 90 сантиметр. Ягона фарзанди хонадон аст, ки ба варзиш машғул мебошад. Замони хурдӣ ҳамроҳи дугонааш ба тамрингоҳ рафта, варзишгардухтаронеро, ки карате-до машқ мекарданд тамошо мекард. Он тамошои якрӯза дар дили Моҳру ҳаваси варзишгар шуданро бедор намуд...
Суҳбати мо бо Моҳру Ҳалимова дар Фурудгоҳи байналмилалии шаҳри Душанбе иттифоқ афтод.

- Салом алейкум, Моҳру. Сафар ба хайр...?
- Воалейкум ассалом. Насиб бошад, ба Корея меравам.
- Ҳамроҳатон...?
- Ҳа, шинос шавед, ин кас Чон Чон Фи, мураббии ман.
- Саломат бошед, аз шиносоӣ шодам.
- Ташаккур.

- Солҳои охир Шуморо дар Тоҷикистон хеле кам мебинем. Мегуфтед, ки барои корҳои шахсӣ ба Корея сафар мекунед ё барои омода шудан ба мусобиқаҳо?

- Соли дуюм аст, ки дар Донишгоҳи Корея таҳсил мекунам. Дар баробари таҳсил барои омода шудан ба мусобиқаҳои сатҳи байналмилалӣ тамрин мекунам. Корея, ки асосгузори таэквандо ба ҳисоб меравад, ин намуди варзиш дар он ҷо рушд кардааст. Зинаҳои аввали тамринро дар Тоҷикистон гирифта, давоми ду соли таҳсил тавонистам, ки узви яккачини дастаи Донишгоҳи Корея гардам. Дар мусобиқаҳои дохили Корея аз номи донишгоҳ ҳунарнамоӣ мекунам ва дар мусобиқаҳои сатҳи байналмилалӣ бошад аз номи Тоҷикистон, ки барои омода шуданам ба мусобиқаҳои сатҳи байналмилалӣ ёрӣ мерасонад.

моҳру1.gif

- Гуфтед, ки дар мусобиқаҳои дохили Корея аз донишгоҳ баромад мекунед. Рақобат миёни варзишгарони онҳо чӣ гуна аст, оё бароятон мушкил нест?

- Дар Корея аз намуди таэквандо миёни варзишгаронашон рақобат бисёр сахт аст. Зеро таваҷҷуҳи мардум ба ин намуди варзиш зиёд аст. Мусобиқаҳои дохилӣ дар ин кишвар мисли мусобиқаҳои сатҳи байналмилалӣ мегузаранд. Зеро дар ҳар шаҳру ноҳияи ин давлат базаҳои калони варзишӣ сохта шудааст, ки аз хурд то бузург ба таэквандо машғуланд. Дар аввал бароям мушкил буд. Вале ин зинаҳо пушти сар гардид. Мо - варзишгарони тоҷик аз ҷиҳати ҷисмонӣ обутобёфтаем ва ин ба мо имкон медиҳад, ки дар дилхоҳ намуди варзиш зуд мутобиқ шавем. Ман дар кӯтоҳтарин муҳлат шомили дастаи якачини донишгоҳ гардидам. Ин барои таҷрибаи варзишиям як навгонии хуберо ба бор овард. Дар баробари муаррифии донишгоҳ барои муаррифии миллату давлатам дар мусобиқаҳои сатҳи байналмилалӣ омодагии ҳамаҷониба мегирам, ки бароям мояи ифтихор аст.

- Аксар варзишгарони ҷаҳонӣ дар ин намуди варзиш рақиби асосӣ варзишгарони Кореяро меҳисобанд, Шумо чӣ?

- Дар аввал ман низ ҳангоми муҳориба бо ин варзишгарон ҳарос доштам. Ҳоло не, дигар ҳарос аз ман дур шудааст, зеро ҳар рӯз миёни онҳоям, бо онҳо зиёд муҳориба мекунем, тактика ва усулҳои онҳоро аз худ намудаам. Бартарияти ҳарифони ман дар мусобиқаҳои байналмилалӣ дар он аст, ки таҷрибаи онҳо зиёдтар аст. Ман агар шаш сол ба ин намуди варзиш машғул бошам, ҳарифони ман 15-20 сол мешавад, ки тамрин мекунанд. Ба ғайр аз мусобиқаҳои байналмилалӣ дар ду ё се олимпиада иштирок кардаанд, ки ин таҷриба барои ғолиб омадани онҳо дар муҳорибаҳо замина фароҳам меорад.

моҳру4.gif
- Варзишгарони тоҷикро дар ин риштаи варзиш чӣ гуна қабул доранд?

- Албатта, баробари варзишгарони кишварҳои дигар. Бачаҳои мо аз ҷиҳати ҷисмонӣ бисёр обутобёфтаанд, танҳо таҷриба намерасад барояшон. То ҳол ман во нахурдаам, ки дар мусобиқаҳои сатҳи байналмилалӣ варзишгари тоҷик дар намуди таэквандо ВТФ бо ҳисоби калон муҳорибаро бохта бошанд. Холи баланди баланд ду ё серо ташкил мекунад, ки ин холҳо барои ҳарифон ба осонӣ ба даст намеояд. Дар муқоиса бо дигар кишварҳо дастовардҳои варзишгарони тоҷик нисбат ба шароити доштаашон бештар аст. Нисбат ба солҳои пеш иштироки варзишгарони тоҷик дар мусобиқаҳои байналмилалӣ зиёд шудааст, вале ин барои натиҷаи хуб ба даст овардан хеле кам аст. Кумитаи ҷавонон, варзиш ва сайёҳӣ, Кутимитаи миллии олимпӣ варзишгаронро ба мусобиқаҳо сафарбар мекунанд, вале хеле кам. Саҳми федератсияҳои мо барои омода намудани варзишгарон бисёр суст аст. Масалан, Федератсияи таэквандо ВТФ чунин шароите надоранд, ки варзишгарро аз хурдӣ тарбия карда, то сатҳи олимпиада расонанд. Баъдан мураббиҳои таҷрибадор надорем. Дар омода намуди варзишгарон сарпараст низ саҳми калон мебозад.

- Ҷоизаи Президент барои ғолибони мусобиқаҳои сатҳи байналмилалӣ таъсис ёфт. Аз нигоҳи Шумо ин иқдом чӣ саҳм мегузорад дар рушди варзиши кишвар?

- Беҳтарин иқдом дар соли 2015 барои варзишгарон таъсиси ҳамин ҷоиза буд. Баъди таъсиси ин ҷоиза умеди мо ба ояндаи варзиши кишвар бештар шуд. Ҳолатҳое буданд, ки аз мусобиқаҳои сатҳи байналмилалӣ бо медал ба Ватан баргаштем, аммо дар фурудгоҳ касе моро пешвоз нагирифт. Касе намегуфт, ки ҳамин варзишгар чунину чунон дастовард дорад. Ин муносибат барои мо - варзишгарон бисёр аламовар буд. Шукри Худо, солҳои охир варзишгарон худро танҳо эҳсос намекунанд. Вақте мо дар мусобиқаҳо мақомҳои ифтихориро ишғол мекунем, на танҳо бар он умедем, ки моро дар Ватан нағз пешвоз мегиранд, инчунин ифтихор мекунем, ки меҳнати моро худи Пешвои миллатамон қадр мекунад. Агар чунин ҷоизаҳою дастгириҳо дар соҳаи варзиш минбаъд ҳам идома ёбад, бо боварии комил метавон гуфт, ки иштироки варзишгарони тоҷик дар олимпиада, ки қуллаи баландтарини варзиш аст, бештар мешавад.

- Омодагиҳоятон дур аз Ватан ва канори пайвандон сипарӣ мешавад. Ин ба ҳолати равонии Шумо таъсир намерасонад?

- Ҳолатҳое мешавад, ки пазмони Ватану наздикон мешавам, вале омода шудан ба мусобиқаҳо он ҷо бароям беҳтар аст. Дар хона бошам, баробари тамрин боз дигар мушкилоти оилавӣ пеш меояд, ки барои онҳо низ бояд фикр кунӣ. Дар Корея бошад, дар наздам як ҳадафу як мақсад аст: ҷоизадор шудан дар олимпиада. Аз мушкилиҳои дигар фориғам. Соле як-ду маротиба ба хабаргирии пайвандон меоям.

- Оиладор шавед, аз варзиш меравед?

- Айни ҳол фикри оила барпо карданро надорам, зеро нақшаи тамринии чорсоларо бо мураббиям Чон Чон Фи тартиб додаам, ки аз моҳи июл тамринҳо дар 2 ва 3 баст оғоз мегарданд. Ҳадафи асосӣ иштирок дар олимпиадаи 2020 мебошад, ки аз ҳозир омодагиҳоро шуруъ мекунем. Бо мураббиёни кореягӣ шартнома бастаем, тӯли ин муддат бояд ҳамаҷониба тайёр шавам. Инчунин бо донишгоҳ низ шартнома бастаем, ки дар баробари таҳсил ба тамрин машғул мешавам ва барои тамринам бояд, ки ягон мушкилӣ пеш наояд. Насиб, баъди олимпиада фикри оила барпо карданро мекунам. Баъди оила барпо намудам кӯшиш мекунам, ки ба ҳайси мураббӣ фаъолият намояму аз иштирок дар мусобиқаҳои сатҳи байналмилалӣ даст кашам.

моҳру-2.gif

- Агар барои Шумо дубора интихобро пеш гузоранд, кадомро интихоб мекунед?

- Албатта, варзишро. Он камбудиҳое, ки дар соҳаи варзиш доштам, ба монанди каме дертар варзишро интихоб намудаму дар баъзе ҳолатҳо беэътиноӣ зоҳир кардам, ҳамаи инҳоро ислоҳ намуда, барои таҷрибаи зиёд гирифтан дар варзиш мемонам.

- Баъди ҷамъбасти карйераатон дар Корея мемонед ё ба Тоҷикистон бармегардед?

- Дар нақша аст, ки баъди ҷамъбасти карйераи варзишиам ба Ватан баргардаму мактаби таэквандо ВТФ-ро дар шакли замонавӣ ташкил намуда, ба тарбияи шогирдон машғул шавам. Худо кунад, ки аз ин намуди варзиш медали тиллои Бозиҳои олимпӣ вориди хазинаи тиллоии варзиши кишвар гардад.

- Ба ҳаводорони варзиши кишвар чӣ гуфтаниҳо доред?

- Пеш аз ҳама барояшон саломатӣ мехоҳам. Парафшон шудани парчам дар арсаи ҷаҳонӣ танҳо ифтихори ман не, балки ифтихори ҳар тоҷику тоҷикистонӣ аст. Бисёр хоҳиш мекунам, ки қатори писарон дар толорҳо духтарон ҳам бештар ба тамрин машғул шаванд.

Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
25 26 27 28 29 30 1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 31 1 2 3 4 5

Май 2022 c.