Таҳти ҳамин унвон имрӯз, 21 декабр дар Донишкадаи тарбияи ҷисмонии Тоҷикистон ба номи С. Раҳимов бо иштироки варзишгарон ва мутахассисони соҳа семинар - машварат доир гардид.

Дар чорабинӣ муовини раиси Кумитаи кор бо ҷавонон ва варзиш Дилшод Назаров, котиби генералии Кумитаи миллии олимпӣ Муҳаммадшо Абдуллозода ва раиси Ассотсиатсияи тиббии варзишии ҶТ Ҳабибулло Саидов ширкат намуда, оид ба истифода набурдани доруҳои мамнуъ дар варзиш аз ҷониби варзишгарони тоҷик ва оқибатҳои истифодаи он изҳори андеша карданд.

Зикр гардид, ки солҳои охир истифодаи допинг аз ҷониби варзишгарони тамоми давлатҳо зиёд истифода шуда истодааст ва ин зуҳурот ба варзишгарони тоҷик низ омада расидааст. Тайи ду соли охир аллакай 5 варзишгар аз кишвари мо барои истифодаи доруҳои мамнуъ айбдор шуданд. Дар ин масъала мураббиён бояд бо варзишгарон кор баранд, бо рӯйхати доруҳои мамнуъ, ки дар сомонаи Кумитаи миллии олимпӣ ва Кумитаи кор бо ҷавонон ва варзиш дастрас аст, шинос шаванд. Истифодаи доруҳои мамнуъ на танҳо бар зарари варзишгар аст, балки боиси коста шудани обрӯи давлат дар арасаи ҷаҳон гардида, иштироки дастаҳои мунтахабро дар бозиҳои байналмилалӣ манъ мекунад.

Бояд гуфт чанде пеш дар Кумитаи миллии олимпии Тоҷикистон семинари омӯзишӣ оид ба допинг ва роҳҳои пешгирӣ намудани он аз тарафи мутахассисони Агентии миллии зиддидопингии Ҷумҳурии Қазоқистон Венера Абдулло ва Кулман Нисанбаева баргузор шуд. Дар ин семинар ба кормандони Кумитаи миллии олимпии Тоҷикистон, Кумитаи кор бо ҷавонон ва варзиш, намояндагони федератсияҳои варзишӣ ва кормандони Маркази тибби варзишӣ тарзи гузаронидани ташхиси зидди допинг, пур кардани анкетаҳои махсуси назорати допинг, вақт ва замони гузаронидани ташхис ва ҷиҳатҳои дигари гузаронидани ташхиси допингиро фаҳмониданд.

Аз ҷумла қайд карда шуд, ки ташхиси допинг дар ду ҳолат гузаронида мешавад. Ҳолати мусобиқавӣ ва ҳолати берун аз мусобиқа. Тибқи талаботи Агентии байналмилалии зидди допинг нозирони допинг ҳар вақт метавонанд бе огоҳӣ ба манзил ё ҷои тамрини варзишгар рафта, ташхис гузаронанд. Варзишгарон, ҳамчунин ҳангоми мусобиқа, қабл ё баъд аз қувваозмоӣ аз ташхиси допинг мегузаранд.

Тибқи талаботи Агентии байналмилалии зидди допинг ҳар варзишгари сатҳи олӣ дар як сол камаш 3 маротиба бояд аз ташхиси допинг гузарад. Дар сурати нагузаштан аз ташхис ба мусобиқаҳои сатҳи байналмилалӣ роҳ дода намешаванд.