Дар шаҳри Қурғонтеппа чанде пеш даври ниҳоии Спартакиадаи донишҷӯён байни муассисаҳои олии кишвар баргузор гардид, ки дар вазни 65 кг аз рӯи намуди гӯштини миллӣ донишҷӯи Донишкадаи тарбияи ҷисмонии Тоҷикистон ба номи С. Раҳимов Муҳаммад Баротов ҳамаи ҳарифони худро мағлуб намуда, ҷои аввалро соҳиб гардид.

Муҳаммад аз сини чорсолагӣ ба гуштини миллӣ машғул аст. Ӯ айни ҳол донишҷӯи соли сеюми факултети варзиши ДДТТ мебошад.

То имрӯз аз намуди варзиши гуштини миллӣ 6 маротиба дар мусобиқаҳои ҷумҳуриявӣ иштирок карда, сазовори ҷойҳои ифтихорӣ гардидааст.

Муҳаммад зери роҳбарии мураббиаш Рустам Боқиев ба тамрин машғул шуда, аз дастгирии роҳбарияти донишкада миннатдор мебошад.

Ӯ айни ҳол баҳри иштирок дар мусобиқаи байналмилалӣ, ки дар кишвари Белоруссия моҳи июл баргузор мегардад, омодагӣ мегирад. Ин аввалин ҳунарнамоии Муҳаммад дар хориҷ аз кишвар мешавад, ки аз намуди гуштини ҷудо ҳунарнамоӣ мекунад.

 Беҳрӯз ХОЛМУРОДОВ, “ҶТ”