Муҳаммадҷон Абдуҷалилзода, варзишгари ҷавони тоҷик дар чемпионати Осиё - уқёнус оид ба ҷудо, ки 4- 5 декабри соли равон дар шаҳри Бейрути Лубнон доир гашт, дар вазни 81 кило иштирок намуда, соҳиби медали нуқра гардида, Парчами меҳанро баланд бардошт. Перомуни фаъолияти варзишӣ бо ӯ суҳбате оростем, ки фишурдаи онро пешкаши хонанда менамоем.

- Аввалан шуморо барои сазовори медали нуқра гардидан, табрик мегӯям.

- Ташаккури зиёд.

- Интизорӣ доштед, ки рӯзе дар чунин мусобиқаи сатҳи ҷаҳонӣ бо ҳамватани худ қувваозмоӣ мекунед?

- Бале, дар вазни 81 кило аз ҷумҳуриямон ману Шодмон ширкат доштем. Бояд ҳардуи мо ба мусобиқа рафта, он ҷо қувваозмоӣ мекардем. Ва ҳамин тавр ҳам шуд. Вақте ки натиҷаи қуръапартоӣ аён гашт, Шодмонро паҳлуи худ дидам.

- Вақте медали нуқраро ба гардан овехтед, он замон бештар чӣ эҳсосот шуморо фаро гирифт ва аз чӣ ифтихор мекардед?

- Воқеан, вақте ки орзуҳо амалӣ мешаванду қадр меёбанд, як эҳсосоти фараҳбахше дар вуҷуди кас пайдо мешавад, ки ин боиси хушнудист. Ҳамон лаҳза ман ҳам чунин ҳиссиётро доштам. Барои он ки тавонистам Парчами кишвари азизамро парафшон кунам. Орзуи гирифтани медали тиллоро доштам. Аммо дар насибам медали нуқра будааст. Ба ҳаминаш ҳам шукр. Ман бештар аз он хушҳолам, ки дар даври ниҳоӣ ҷойи аввалро ҳамватани ман Шодмон соҳиб гашт.

- Кӣ шуморо ба варзиш роҳнамоӣ кард?

- Вақте ки кӯдак будам, бештар ба гӯштини миллӣ майл доштам. Дар бораи варзиши ҷудо ҳатто тасаввурот ҳам надоштам. Бесаброна гӯштиҳои миллиеро, ки дар ҷашнҳои Наврӯз дар ҳар гӯшаю канори кишвар баргузор мегардид, интизор мешудам, то маҳорати худамро бисанҷам. Бо як шавқ дар мусобиқаҳо иштирок мекардам.

Дар соҳаи варзиш маро падарам роҳнамоӣ мекард. Падарам паҳлавон аст. Имрӯз ман бо роҳнамоиву дастгириҳои падарам ба ин ҷодаҳо расидаам. Вақте хӯрд будам, ба падарам тақлид карда, чандин ҳамсолон, ҳатто аз худ бузургтарҳоро низ шикаст медодам. То синфи ҳафт дар мусобиқаҳои маҳаллӣ иштирок доштам. Шавқу ҳаваси кӯдакиам буд, ки дар пеш мақсад гузоштам, то хуб тамрин карда, дар мусобиқаҳои сатҳи баланд ғолиб шавам.

- Киро барои худ идеал мешуморед?

- Идеали ман дар ҷодаи варзиш ин падарам Абдуҷалилов Абдухайёз мебошад. Он кас шуҳрату мақоми хоса миёни варзишгарон доштаю то ҳол дорад. Ман низ мехоҳам чун падарам муваффақу комёр ва шуҳратёр гардам.

- Интизор доштед, ки дар чунин мусобиқаи сатҳи қитъавӣ соҳиби медал мегардед?

- Бале, ман бовар доштам. Чун тайёрии хуб дида будам. Ин бори аввал аст, ки дар мусобиқаи чунин сатҳ иштирок намудам. Пеш аз ин дар мусобиқаҳои гуногуни кишварамон миёни наврасон чандин маротиба дастболо шуда будам. Пеши худ мақсад гузошта будем, ки бояд бо сари баланд ба ватани азизамон бармегардем. Ва ҳамин тавр ҳам шуд.

- Ба наврасону ҷавонон ҷиҳати машғул шудан ба варзиш чӣ тавсия медиҳед?

- Ба наврасоне, ки бори нахуст ба варзиш машғул мешаванд, гуфтаниям: пеш аз ҳама аввал бояд дӯстдори варзиш бошанд. Бо як ҳавасу шавқи зиёд ба варзиш машғул шаванд. Чунки имрӯз дар кишвар кулли шароитҳо муҳайёст.

- Дар оянда чӣ нақшаҳо доред?

- Дар оянда нақшаҳо зиёд аст. То ширкат дар чемпионати ҷаҳон миёни калонсолон ду соли дигар вақт дорам. Тайи ин ду сол пайваста тамрин хоҳам кард. Мехоҳам ба варзишгарони сатҳи ҷаҳонӣ баробар шаваму соҳиби медали тилло гардам.

PS: Хонандаи азиз! Шумо метавонед, шакли видеоии мусоҳибаи мазкурро аз силки зер тамошо кунед.
https://youtu.be/5XJtu8Gd2i8