Насриддинов Ёқубҷон варзишгари ҷавону умедбахш, номзад ба устоди варзиши Ҷумҳурии Тоҷикистон оид ба каратэ-до, ғолиби мусобиқаи кушоди шаҳри оид ба карате “Кёкушинкай” ва ҳамзамон ҷоизадори мусобиқаи ҷумҳуриявии каратэ-до дар соли 2017 мебошад.

Ёқубҷон ҳамагӣ 21 сол дорад. Ӯ аз синни наврасӣ ба варзиш машғул буда, то инҷониб дар намуди карате-до ҳунарнамоӣ мекунад. Тамринҳои ибтидоии ӯ нахуст аз мактаби варзишии “ДОСААФ” оғоз ёфтаанд. Ёқубҷон мегӯяд, ки шавқи варзишгар шуданро дар дилаш маҳз волидонаш бедор кардаанд. Чун падараш орзуи варзишгар будани Ёқубҷонро дошт, пайваста ӯро ба мактаби варзишие, ки худаш онҷо тамрин менамуд, мебурд. Ҳаракатҳои ҷолибу усулҳои завқбахши варзишгарон ӯро дилбохтаи ин ришта гардониданд. Ёқубҷон ҳар рӯзи нав бо завқу умеди варзишгари муваффақ гардидан, роҳ сӯйи варзишгоҳро мегирифт. Чунончӣ ӯ меафзояд: “Агар орзуву умеди падарам намебуд, шояд ман роҳи дигарро интихоб мекардам, вале шукр, ки бо заҳматҳои падарам имрӯз дар роҳи хеш муваффақам”.

Маҳз натиҷаи заҳматҳои беохираш буд, ки Ёқубҷон дар мусобиқаи кушоди шаҳрӣ миёни варзишгарони зиёде, ки аз тамоми манотиқи ҷумҳурӣ иштирок доштанд, дар вазни 65 кг сазовори ҷойи аввал ва медали тиллои мусобиқа гардид. Ҳамзамон соли 2016 дар мусобиқаи ҷумҳуриявии “Каратэ-до” Ёқубҷонро муяссар гардид, ки медали нуқраро ба даст биёрад.

Соли 2017, ки дар ҳаёти ҷавонону варзишгарони мамлакат ҳамчун соли хотирмону таърихӣ сабт гардидааст, барои Ёқубҷон низ хотироти рангинеро ба ёдгор гузоштааст. Ёқубҷон дар ин сол дар мусобиқаҳои зиёди ҷумҳуриявию минтақавӣ иштирок намуда, сазовори медалу ифтихорномаҳои зиёд гардидааст. Аз ҷумла, дар мусобиқаи ҷумҳуриявии “Каратэ-до” миёни наврасон иштирок намуда, бо медал, диплом ва туҳфаҳои хотиравӣ сарфароз гардидааст. Мақсади ягонаи Ёқубҷон иштирок дар мусобиқаҳои байналмилалӣ буда, орзуи қаҳрамони ҷаҳон шуданро дар дил мепарварад.

Ӯ бо вуҷуди шавқу рағбати беандоза доштан дар роҳи варзиш, боз илмдӯсту китобдӯстдор низ ҳаст. Ӯ баъд аз хатми мактаби хонандагони болаёқати шаҳри Душанбе, ҳамчун талабаи фаъолу сермаҳсул забонҳои русӣ ва англисиро пурра аз бар намуд. Забондониаш ба ӯ имкон дод, ки таҳсилашро дар “LIFE PREP ACADEMY”-и штати Канзаси Амрико идома дода, барои сайқал додани дониши худ таҳсили илм намояд.

Маврид ба қайд аст, ки Ёқубҷон тамринҳояшро хориҷ аз кишвар низ идома дода, дар мусобиқаҳои зиёде миёни ҷавону наврасони ИМА иштирок намудаву сазовори ҷойҳои ифтихорӣ гардидааст.

Қиёмиддин МАҲМАДҶОНОВ,
“ҶТ”