ВАРЗИШ
Душанбе 22 Октябр 2018 06:51
4478
Чемпионати ҷаҳон оид ба футбол, ки имсол дар кишвари Русия доир мегардад, маротибаи ХХI-умини баргузориаш ба ҳисоб меравад. Ин мусобиқаи сатҳи ҷаҳонӣ ҳар чор сол як маротиба гузаронида шуда, барои роҳхат пайдо намудан ба он 209 давлат мубориза мебаранд.

18 марти соли 2009 аз ҷониби Федератсияи байналмилалии футбол (ФИФА) барои ба даст овардани мизбонии Ҷоми ҷаҳон-2018, 11 кишвар - Русия, Австралия, Англия, Индонезия, Мексика, ИМА, Ҷопон, Португалия ва Испания ( аризаи муштарак), Белгия ва Нидерландия (аризаи муштарак) номзад шуда буданд. 2 декабри соли 2010 дар конгресси ФИФА Русия аз миёни панҷ давлат бо гирифтани нисфи овозҳо мизбонӣ Ҷоми ҷаҳон-2018 интихоб шуд, ки ин бори нахуст дар таърихи кишвари мазкур буда, инчунин маротибаи аввал дар Аврупои Шарқӣ аст.

Қуръакашии даври ниҳоии бозиҳоӣ Чемпионати ҷаҳон оид ба футбол-2018, 1 декабри соли 2017 дар Қасри Кремли шаҳри Москва баргузор гардид, ки дар он беҳтарин ситораҳои футбол ва коршиносони соҳа иштирок намуданд. Дар чорабинии мазкур нахустин шуда, президенти Русия Владимир Путин баромад намуда, барои интихоб шудани кишвараш ба ҳайси мизбони мусобиқа ҳозиринро табрик гуфт ва иброз дошт, ки “кишвари Русия бесаброна ин мусобиқаро интизор аст ва омода аст, ки онро дар сатҳи баланд баргузор намояд”.

Роҳбари Федератсияи байналмилалии футбол, Ҷанни Инфонтино аз баргузор шудани бозиҳо дар Русия изҳори қаноатмандӣ намуда, умед баст, ки бозиҳои 21-уми Ҷоми ҷаҳони футбол таърихи наверо дар футбол боқӣ хоҳанд гузошт.

Баъдан бо иштироки ситораҳои футболи ҷаҳон Никита Симонян, Гордон Бэнкс, Диего Форлан, Диего Марадона, Лоран Блан, Кафу, Карлес Пуйол ва Фабио Каннава маросими қуръакашии мусобиқа доир гардида, дар натиҷа 32 даста ба 8 гурӯҳ ҷудо шуданд.

Чемпионати ҷаҳон -2018 оид ба футбол, ки аз 14 июн то 15 июл ҷараён мегирад, 32 дастаи мунтахаб дар 11 шаҳру 12 варзишгоҳи Русия қувва меозмоянд.

Варзишгоҳи “Лужники”-и шаҳри Москва, яке аз варзишгоҳҳои машҳури давлати Русия дониста мешавад, ки он дорои 80 ҳазор ҷои нишаст мебошад. Бозии ифтитоҳии Чемпионати ҷаҳон 14 июни соли 2018 байни дастаҳои мунтахаби Русия ва Арабистони Саудӣ баргузор мегардад.

То оғози бозиҳо 3 рӯз боқӣ мондааст. Дар зимн хостем андешаҳои коршиносонро дар бораи муддаиёни асосии Ҷоми ҷаҳон-2018 оид ба футбол мавриди баррасӣ қарор диҳем.

Пас аз қуръакашии даври ниҳоӣ миёни коршиносон дар мавриди имконияти аз гурӯҳҳо баромадани дастаҳо баҳсу мунозираҳои зиёд ба миён омад. Бештари дӯстдорони футбол бар он андешаанд, ки тими мунтахаби Русия, ҳамчун мизбон дар гурӯҳи тимҳои наонқадар қавӣ ҷой гирифта, имкони дар бозиҳои гурӯҳӣ ба муваффақият ноил гардиданро дорад. Ҳатто шореҳони рус баъди анҷоми қуръакашии бозиҳо ҳадс мезананд, ки мунтахаби Русия маҳз дар муқобили дастаҳои Миср ва Арабистони Саудӣ метавонад бозии хуб нишон дода, ба даври 1/8-ниҳоӣ роҳ ёбад.

Дар ин замина қисме аз коршиносони сайёра якчанд дастаҳоро ба қатори ҷӯяндагони унвони қаҳрамонӣ ном мебаранд.

Чанде пеш сомонаи “EFE” - Агентии хабарии мустақили испанӣ, хабареро нашр намуд, ки роҳбари Федератсияи Русия Владимр Путин мунтахаби Испанияро яке аз довталабони чемпионат номида, муддаии асосии Ҷоми ҷаҳон-2018 унвон кардааст. Дастаи мунтахаби Испания аввалин маротиба соли 1964 қаҳрамони Чемпионати Аврупо гардидааст. Инчунин тӯли даҳ соли охир соҳиби се Ҷом шудааст. Соли 2008 дар Австрия ва Швейтсария ғолиби Чемпионати Аврупо ва соли 2010 қаҳрамони ҷаҳон гардидааст. Футболбозони испанӣ боз ду соли дигар шикастнопазир монданд ва соли 2012 бори дигар аз нав унвони қаҳрамонии Аврупоро соҳиб шуданд. Бо ин дастовардҳо дастаи мунтахаби Испания панҷумин мунтахаби аврупоӣ мебошад, ки медалҳои тиллои чемпионии ҷаҳонро ба гардан овехтааст. Футболбозони испанӣ ин навбат ҳам яке аз рақибони сарсахт дар чемпионат маҳсуб меёбанд.

Фарҳод Ҷаборов, мутахассиси тоҷик, тими якачини Олмонро ғолиби Мундиал-2018 мепиндорад, зеро ба андешаи ӯ бошгоҳи Олмон дар баробари дастаи мунтахаби Бразилия аз ҳама дастаи беҳтарини футболи ҷаҳон ва Аврупо ба шумор рафта, чор маротиба унвони чемпионии ҷаҳонро ба даст овардааст. Ин даста на танҳо 4 маротиба соҳиби Ҷоми ҷаҳон, балки чор маротиба соҳиби медалҳои нуқраи Ҷоми ҷаҳон ва 4 маротиба барандаи медалҳои биринҷӣ мебошад. Дастаи мунтахаби Германия дар Аврупо ҳам яке аз пурқувваттарин тим дониста мешавад, ки он 3 маротиба чемпиони Аврупо, 3 маротиба барандаи медалҳои нуқра ва се маротиба соҳиби медалҳои биринҷӣ шудааст. Бозии нишондодаи ҳайати сеюми мунтахаби Германия дар Ҷоми Конфедератсия -2017 ҳамаро ба ҳайрат овард. Аз ин рӯ, бе муҳобо гуфта метавонем, ки ин бошгоҳ яке аз муддаиёни асосии Чемпионати Ҷаҳон-2018 мебошад.

Дар ҳоли ҳозир тими миллии Германия дар раддабандии ФИФА бо доштани 1544 хол дар зинаи аввал аст. Рафту маротибаи панҷум дар чемпионати ҷаҳон ғалаба насиби ин даста шавад, дар нишондоди чемпионӣ бо дастаи мунтахаби Бразилия баробар хоҳад шуд.

Дар бобати мунтахаби Бразилия сухан гуфтем ва ин даста барои ба даст овардани унвони қаҳрамонӣ ақибнишинӣ нахоҳад кард.

Меҳроби Исроилиён, шореҳи футбол, тими Бразилияро даъвогари асосӣ меҳисобад. Ӯ мегӯяд, имрӯз ҳайати мунтахаби Бразилияро футболбозони моҳиру тавоно ташкил медиҳад. Назар ба солҳои қаблӣ бозии ин бошгоҳ хуб ба назар мерасад. Чӣ хеле ки шоҳид шудем, мунтахаби Бразилия аввалин шуда, дар бозиҳои интихобии Чемпионати ҷаҳон - 2018 роҳхатро ба даст овард. Ҳарчанд дар Чемпионати ҷаҳон-2014, ки онро мизбони мекард аз мутахаби Олмон шикаст хӯрд. Бовар дорам ин навбат ҳарифи ҷиддии Олмон мегардад.

Футболбози машҳури ангилис Дэвид Бекхэм дар сомонаи иҷтимоиаш навиштааст, ки бо писаронаш ин навбат тими мунтахаби Аргентинаро дастгирӣ менамояд. Зимни гузаронидани назарпурсӣ дар сомонаҳои иҷтимоӣ бештари дӯстдорони футбол ба ин даста овоз медоданд. Дастаи мунтахаби Аргентинаро бе футболбози моҳир Мессӣ тасаввур кардан ғайриимкон аст. Вақте Мессӣ аз анҷоми фаъолияти худ дар тими мунтахабаш эълон намуд, дӯстдоронаш дар кӯчаҳои пойтахти Аргентина ҳамоиши этирозӣ намуда, аз ӯ хоҳиш намуданд, ки ба дастаи мунтахаб баргардад. Мунтахаби Аргентина айни ҳол дар зинаи 5 –уми раддабандии ФИФА қарор дошта, дар шомили дастаҳои беҳтарини дунё аст. Дастаи мунтахаби Аргентина барои ба бозиҳои ниҳоии Чемпионати ҷаҳон- 2018 роҳхат гирифтан, душвориҳои зиёдеро аз сар гузаронда, дар мавриди охир ба даври ниҳоии Чемпионати ҷаҳон-2018 роҳ ёфт.

Кадом даста метавонад медалҳои тиллои Ҷоми ҷаҳонро ба гардан овезад, инро вақт нишон хоҳад дод.

Ёдовар мешавем, ки аввалин маротиба 28 майи соли 1928 дар конгресси ФИФА Федератсияи байналмилалии футбол, ки дар Амстердам ҷараён гирифт, қарори ниҳоии ташкили Ҷоми ҷаҳон қабул шуд. Ва 18 майи соли 1929 давлати Уругвай ҳамчун мизбони мусобиқаи Ҷоми ҷаҳон-1930 дониста шуд, зеро дастаи миллии Уругвай қавитарин даста дар он замон ба ҳисоб мерафт. Бозии аввалини финалии чемпионати мазкур байни дастаҳои Уругвай ва Аргентина гузашта, тими Уругвай дар шоҳидии 70 ҳазор мухлис Аргентинаро бо ҳисоби 4:2 шикаст дод ва ғолиби аввалини Ҷоми ҷаҳон ҳисобида шуд. Дар тамоми таърихи мусобиқоти қаҳрамонии ҷаҳон 8 кишвар бо унвони қаҳрамонӣ шарафёб гардидаанд. Аз ҳама бештар қаҳрамонии Ҷоми ҷаҳонро давлати Бразилия, 5 маротиба ба даст овардааст. Италия ва Олмон 4 маротибагӣ, Аргентина ва Уругвай ду маротиба, Англия, Фаронса ва Испания як маротибагӣ медалҳои тиллои Ҷоми ҷаҳонро ба гардан овехтаанд. Ягона футболбозе, ки 3 маротиба дар Чемпионати ҷаҳон ба ҳайси бозингар ширкат кардааст, футболбози бразилиягӣ Пеле (солҳои 1958,1962,1970) мебошад.

Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31 1 2 3 4

Октябр 2018 c.