Дастаи мунтахаби наврасони то 16-солаи футболи Тоҷикистон дар бозии нахустинаш дар мусобиқаи байналмилалӣ барои дарёфти Ҷоми Президенти Ҷумҳурии Қазоқистон дар рақобат бо дастаи мунтахаби наврасони Арманистон (U-17) бо ҳисоби 2:1 пирӯзӣ ба даст овард.

Ин бозии гурӯҳи “В” рӯзи якшанбеи 25-уми август дар шаҳри Нурсултони Қазоқистон доир гашт. Бозингарон Суннатулло Азизов ва Муҷовид Шовайсуддинов аз дастаи мунтахаби наврасони Тоҷикистон голҳоро ба дарвозаи дастаи рақиб заданд ва ғолибияти дастаи Тоҷикистонро бар дастаи Арманистон таъмин намуданд.

Гуфта мешавад, ки дар мусобиқаи имсола барои дарёфти Ҷоми Президенти Қазоқистон, ки бори дувоздаҳум баргузор гашта истодааст, дастаҳои мунтахаби наврасони Арманистон, Қирғизистон, Литва, Тоҷикистон ва ду дастаи мунтахаби наврасони Қазоқистон дар ду гурӯҳ миёни ҳам рақобат мекунанд.

Дар гурӯҳи «А» дастаҳои мунтахаби наврасони футболбози Қазоқистон (U-17), Қирғизистон (U-16) ва Литва (U-17) дохиланд. Ва дастаи мунтахаби наврасони Тоҷикистон (U-16) бошад, ҳамроҳи дастаҳои Арманистон (U-17) ва Қазоқистон (U-16) ба гурӯҳи «В» шомил мебошанд.