Дастаи мунтахаби Тоҷикистон пеш аз бозиҳои интихобии Ҷоми ҷаҳон-2026 бо тими миллии Арабистони Саудӣ (21 март, Риёз ва 26 март, Душанбе) барои анҷоми ҷамъомади тамринӣ вориди шаҳри Давҳа шуд.

Дар ин бора сомонаи расмии Федератсияи футболи Тоҷикистон хабар додааст.

Ба иттилои манбаъ, ҷамъомад дар Қатар то 18 март идома хоҳад кард. Баъдан мунтахаби Тоҷикистон барои баргузории бозии сеюми даври дуюми марҳилаи интихобии Ҷоми ҷаҳон-2026 муқобили тими Арабистони Саудӣ аз Доҳа ба Риёз парвоз мекунад. Ин дидор рӯзи 21-уми март дар варзишгоҳи Донишгоҳи Шоҳ Сауд баргузор шуда, соати 23:59 ба вақти Душанбе оғоз мешавад.

Мунтахаби Тоҷикистон пас аз анҷоми бозии сафарӣ ба Душанбе бармегардад ва омодагиро ба бозии хонагии марҳилаи интихобии Ҷоми ҷаҳон-2026 бо тими Арабистони Саудӣ оғоз мекунад. Ин рақобат рӯзи 26 март дар Варзишгоҳи марказии Душанбе доир шуда, соати 20:00 оғоз мешавад.