ВАРЗИШ
Панҷшанбе 13 Август 2020 05:39
1688
Чанде пеш сеюмин мусобиқаи байналмилалии варзишӣ-сайёҳӣ оид ба қаиқронӣ, ки бо ибтикори Кумитаи ҷавонон, варзиш ва сайёҳӣ ва Ассотсиатсияи эко - фарҳангии Помир дар Қарокӯл ҷамъбаст шуд.

Мусобиқаи мазкур, ки дар байни шаҳрвандони хориҷӣ ҳамчунин бо номи “regatta of roof” ё худ “қаиқронӣ дар боми ҷаҳон” маъруф аст, аз як тараф имтиҳони хосе барои варзишгарони навкори кишвар ва ҳам мураббиён буд.

Ҳамасола ин сабқат дар охири фасли сол баргузор мегардад. Баъзан обу ҳавои тирамоҳӣ имконият намедиҳад, ки он дар сатҳи зарурӣ роҳандозӣ шавад.

Хушбахтона, дар ин сол ҳам пойгаи обӣ дар Қарокӯл барои қаиқронӣ рост омад.

Боди шимолӣ бо қувваи миёна то ба ҳолати мӯътадил ҳаракат дошт. Мавҷҳои начандон калони кӯл барои варзишгарон имконият доданд, ки онҳо дар мусобиқа маҳорати баланди варзишии худро нишон диҳанд.

Оид ба баргузор кардани ин сабқати ҷаҳонӣ, тарзи омодагӣ ба он ва дигар паҳлуҳои риштаи сайёҳӣ бо мудири Бахши ҷавонон, варзиш ва сайёҳии ноҳияи Мурғоб, Ҷонбулот Қамчибеков сӯҳбате оростем.

- Лутфан бигӯед, ки имсол варзишгаронро дар ноҳия чӣ гуна пешвоз гирифтанд ва аз ҳисоби онҳо чанд нафар дар сабқат баромад намуданд?

- Бояд тазаккур дод, ки имсол низ ба иқлими сарди Мурғоб нигоҳ накарда, самти сайёҳӣ дар ноҳия хело пешрафт кард. Аз ҷумла, ба хотири ширкат варзидан дар мусобиқаи регата сайёҳон қариб аз ҳамаи гӯшаҳои олам омаданд ва барои пазироии хуби онҳо дар ҳамбастагӣ бо ширкатҳои маҳаллии ҷамоати Кара-Кул шароитҳои мусоид фароҳам оварда шуданд.

Воқеан дар мусобиқаи навбатӣ зиёда аз 25 нафар баромад доштанд. Аз ҳисоби онҳо шаҳрвандони кишварҳои Олмон - 5 нафар, Канада - 2 , Шветсария - 2, Қирғизистон - 5 ва Тоҷикистон - 12, дар ҳайати ду даста - 6 нафарӣ баромад карданд. Ҳамчунин 150 нафар дӯстдорони ин намуди варзиш аз давлатҳои ШМА, Фаронса ва ҷумҳурии мо иштирок намуданд.

Рафти омодагиҳо ба чорабинӣ ҳанӯз аз аввалҳои моҳи сентябр оғоз ёфт. Ҷиҳати дар сатҳи лозимӣ қабул кардани меҳмонон пеш аз ҳама ҷавонони ноҳия ҳиссаи сазовор гузоштанд.

Албатта дар мавриди муносибат ва тарзи муошират бо шаҳрвандони хориҷӣ аз тарафи Бахши ҷавонони ноҳия бо мардуми таҳҷоӣ сӯҳбату вохӯриҳо пайваста доир мешаванд. Маҳз саҳми ҷавонони ноҳия ҳаст, ки ҳоло дар Мурғоб нафақат кӯдакону наврасон, балки теъдоди зиёде аз калонсолон бо забонҳои хориҷӣ (англисӣ, русӣ, хитоӣ ва ғ.)қариб озодона ҳарф мезананд. Омӯзгорони ҷавон бо хориҷиён иртиботи наздик доранд ва баъзан онҳоро ҳам барои таълиму тадриси муваққатӣ дар таълимгоҳҳо ҷалб месозанд.

Муаллимони хориҷӣ бо толибилмон ва падару модари онҳо муносибати хуб барқарор мекунанд. Бо ин тартиб таҷрибаи аз худ кардани забони хориҷӣ низ дар байни аҳолӣ васеътар ба роҳ монда мешавад.

Сайёҳон.gif

Ҳамчунин дар ҳолати тоза нигоҳ доштани кӯли Қарокӯл, покиза кардани ҳамаи соҳилҳои он аз ҳар гуна хасу хошок, риояи қоидаҳои санитарӣ, расонидани ҳамагуна кӯмакҳо ба меҳмонон, бахусус дар ҷараёни мусобиқа бо талоши ҷавонон амалӣ мешавад.

Дар вақти баргузории қаиқронӣ ҷавонони ҷамоати Кара-Кул низ дар баробари варзишгарони хориҷӣ моҳирона қувваозмоӣ мекунанд.

Бояд гуфт, ки дар рафти мусобиқаи соли ҷорӣ ҳамаи варзишгарон аз ӯҳдаи шартҳои бозии қаиқронӣ баромада, ба натиҷаҳои хуб ноил гардиданд. Онҳо то масофаҳои охири расидан ба соҳили муқараргардида рақобат мекарданд. Фосилаи муайяншудаи пойгаи бозӣ аз соҳили кӯл чандон дур набуд ва мухлисон низ ҷараёни мусобиқаро озодона пайгирӣ мекарданд.

Вақти миёнаи гузаштан аз дистансия тахминан 45 сонияро ташкил медод ва ҳамчунин дар ин сабқат намунае аз тарҳи дистансияи трапетсияшакл, ки дар мусобиқҳои ҷаҳонии регатта ба кор бурда мешавад, барои навкорон ҳам ёд дода шуд.

- Мувофиқи маълумоти расмӣ дар нимсолаи аввал ба ноҳия беш аз 107 нафар сайёҳ ташриф овард, бигӯед, ки дар ҳоли ҳозир ин шумора ба чанд расидааст?

- Дар нӯҳ моҳи соли ҷорӣ ба Мурғоб зиёда аз 250 нафар сайёҳ аз кишварҳои Иттиҳоди Аврупо, Руссия, Ҳинд, Ҷопон, Австралия ва дигар давлатҳо ворид шуданд. Агар дар қиёс бо нӯҳ моҳи соли 2015 гирем, то ҳозир ин нишондиҳанда аз 75 нафар болотар аст.

Феълан Бахши ҷавонони ноҳия дар ҳамбастагӣ бо ташкилоти сайёҳии маҳаллии Ҷовид ҳадаферо дар пеш гузоштем, ки дар ҷодаи сайёҳии Мурғоб мутахассисони навро омода кунем.

Агарчи теъдоди сайёҳон сол аз сол зиёд шуда истодааст, бароямон лозим меояд, ки сафи роҳбаладону кормандони соҳаро бисёртар кунем.

Толибилмон.gif



Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
27 28 29 30 31 1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31 1 2 3 4 5 6

Август 2020 c.