Дар шаҳри Бохтар бахшида ба 25-умин солагарди Рӯзи таъсисёбии Қувваҳои Мусаллаҳи кишвар аз 22 то 24 феврал мусобиқаҳои кушод аз рӯи намудҳои гӯштин ва шоҳмот баргузор гардид.

Мусобиқаҳои мазкур бо ташаббуси Бахши кор бо ҷавонон ва варзиши шаҳр дар толори МТМУ №12, толори Муассисаи давлатии мактаби варзишии шаҳри Бохтар ва толори варзишии Коллеҷи касбии №9 бо иштироки васеъи ҷавонон баргузор карда шуд.

- Мусобиқаи шоҳмот миёни хонандагони мактабҳои шаҳр гузаронида шуд, - иттилоъ дод Искандар Мирзохонов, мудири Бахши кор бо ҷавонон ва варзиши шаҳр. - Мусобиқаи кушод аз рӯи намуди гӯштин бошад, дар толори МТМУ №12-и шаҳр аз рӯи 10 вазн миёни 124 варзишгар баргузор гардид.

Ғолибон бо туҳфаҳои таъсисдодаи Бахш сарфароз гардонида шуд.