Бахшида ба Рӯзи Парчами давлатӣ 18-19 ноябр дар шаҳри Кӯлоби вилояти Хатлон мусобиқаи ҷумҳуриявӣ аз рӯи намуди гӯштини дзюдо миёни наврасони соли таваллудашон 2004-2005 гузаронида мешавад.

Дар он наврасони дастаҳои Хатлон-1, 2, Душанбе-1, 2, Шаҳру ноҳияҳои тобеи марказ, вилояти Суғд ва ВМКБ ва минтақаи Рашт аз рӯи даҳ вазн (32, 35, 38, 42, 46, 50, 55, 60, 66, ва +66 кило) миёни ҳам рақобат мекунанд.

Мақсад аз гузаронидани мусобиқа ташвиқу тарғиби гӯштини дзюдо дар ҷумҳурӣ, мустаҳакам намудани дӯстӣ байни варзишгарони наврас, баланд бардоштани маҳорати касбии онҳо ва муайян намудани узви дастаи мунтахаби наврасони Ҷумҳурии Тоҷикистон аст.

Мусобиқаи мазкур тибқи қоидаҳои нави муқаррарнамудаи Федератсияи байналмилалии гӯштини дзюдо гузаронида мешавад ва ғолибонро медал ва ифтихономаи Кумитаи кор бо ҷавонон ва варзиши назди Ҳукумати Ҷумҳурии Тоҷикистон интизор аст.