Бахшида ба Рӯзи Парчами давлатӣ 25-26 ноябр дар шаҳри Истаравшани вилояти Суғд мусобиқаи ҷумҳуриявӣ аз рӯи намуди гӯштини юнону румӣ миёни наврасони соли таваллудашон 2004-2005 гузаронида мешавад.

Дар он наврасони дастаҳои Хатлон-1, 2, Душанбе-1, 2, Шаҳру ноҳияҳои тобеи марказ, вилояти Суғд ва ВМКБ аз рӯи даҳ вазн миёни ҳам рақобат мекунанд.

Мақсад аз гузаронидани мусобиқа ташвиқу тарғиби тарзи ҳайёти солим ва гӯштини юнону румӣ дар ҷумҳурӣ, мустаҳкам намудани риштаи дӯстӣ байни варзишгарони наврас, баланд бардоштани маҳорати касбии варзишгарон ва муайян намудани узви дастаи мунтахаби наврасони Ҷумҳурии Тоҷикистон аст.

Мусобиқаи мазкур тибқи қоидаҳои нави муҳаррарнамудаи Федератсияи байналмилалии гӯштини юнону румӣ гузаронида мешавад ва ғолибонро медалу ифтихономаҳои Кумитаи кор бо ҷавонон ва варзиши назди Ҳукумати Ҷумҳурии Тоҷикистон интизор аст.