Бо мақсади оммавияти варзиш ва таҳкими тарзи ҳаёти солим дар ноҳияи Ванҷи Вилояти Мухтори Кӯҳистони Бадахшон миёни ҷавонони 54 деҳа ва шаш ҷамоати ноҳия мусобиқаи волейбол оғоз гашт.

Дар ин бора Фурқати Ҳукумат, мудири Бахши кор бо ҷавонон ва варзиши ноҳия иттилоъ дода гуфт, ки мусобиқа дар асоси нақшаи тасдиқгардидаи раиси ноҳия дар мувофиқа бо сардори Раёсати кор бо ҷавонон ва варзиши вилоят нахуст аз рӯи усули «Деҳа ба деҳа» ва баъдан миёни ҷамоатҳо то охири моҳи октябри соли 2021 ташкилу баргузор мегардад.

Инчунин, ҳадафи чорабинӣ ҷалби ҳарчи бештари ҷавонон ба машғулиятҳои шоиста ва рушди бозии волейбол дар ҷомеа буда, дар охир ғолибон бо мукофоти молию пулӣ аз тарафи мақомоти иҷроияи маҳаллии ҳокимияти давлатии ноҳияву бахш қадрдонӣ мешаванд.