ВАРЗИШ
Сешанбе 21 Май 2024 03:14
10174
Имрӯз дар шаҳри Бишкеки Қирғизистон Чемпионати Осиё оид ба гӯштин оғоз гашт. Мусобиқаи мазкур то 16-уми апрел идома хоҳад кард. Дар ин сабқат 366 варзишгар аз рӯи 30 вазн – 10 вазн гӯштини тарзи озод, 10 вазн гӯштини юнонӣ-римӣ ва 10 вазн гӯштини занон иштирок мекунанд.

Тоҷикистонро дар Чемпионати Осиё оид ба гӯштин 12 варзишгар намояндагӣ мекунад.

Рӯйхати иштирокчиёни мусобиқаи мазкур аз Тоҷикистон ба тариқи зайл аст:

Айаал Белолюбский (-57 кг), Ҷамшед Шарифов (-61 кг), Камол Бегков (-65 кг), Мустафо Ахмедов (-70 кг), Виктор Рассадин (-74 кг), Магомет Евлоев (-79 кг), Ватансултон Шакаршоева (-53 кг), Асламҷон Азизов (-60 кг), Фирӯз Мирзораҷабов (-67 кг), Суҳроб Абдулҳаев (-87 кг), Мирзоамин Сафаров (-97 кг), Эдуард Бабоношев (-130 кг).

Дар рӯзи аввал Тоҷикистонро 4 варзишгар - Айаал Белолюбский (-57 кг), Камол Бегков (-65 кг), Мустафо Ахмедов (-70 кг) ва Магомет Евлоев (-79 кг) намояндагӣ карданд.

Аз миёни онҳо ду нафар Мустафо Ахмедов ва Магомет Евлоев ин шом барои нишони биринҷӣ рақобат хоҳанд кард.

Мустафо Ахмедов, ки дар даври аввал озод буд, дар чорякфинал бар намояндаи Қазоқистон пирӯз гашта, ба нимфинал баромад. Аммо дар ин давр аз варзишгари Эрон мағлуб шуд.

Магомет Евлоев бошад дар ду давр бар варзишгарони Қирғизистон ва Чин ғалаба кард, аммо дар нимфинал аз намояндаи дигари Эрон шикаст хӯрд.

Ҳамин тавр ин ду варзишгари кишвар шоми имрӯз барои ба даст овардани нишони биринҷӣ ба майдон хоҳанд омад. Ҳарифи Мустафо барои гирифтани нишони биринҷӣ Алибек Усмонови қирғиз ва аз Магомет бошад, Хидир Сайфиддинов аз Баҳрайн мебошад.

Эзоҳи худро нависед



Рамзҳо дар расм