Оё ин маротиб “Истиқлол” “Хуҷанд”-ро мағлуб мекунад?

Имрӯз, 1 март, дар меҳмонхонаи “Ҳаятт Реҷенс”- и шаҳри Душанбе, нишасти матбуотии пеш аз бозии ниҳоии Суперҷоми Тоҷикистон миёни дастаҳои “Истиқлол”-и шаҳри Душанбе ва “Хуҷанд”-и шаҳри Хуҷанд баргузор гардид.

Муҳсин Муҳаммадиев, сармураббии дастаи “Истиқлол”-и шаҳри Душанбе аввал ҳамаи журналистон ва мутахассисони соҳаи варзишро ба оғози мавсими нави футбол дар кишвар табрик намуда, иброз дошт: “Бозии фардо, ки барои дарёфти Суперҷоми Тоҷикистон мебошад, бисёр барои мо муҳим аст. Мутаассифона, барои ба даст овардани Ҷоми мазкур соли гузашта муваффақ нашуда будем. Имсол дар пеши мо мақсадҳо бисёр бузург аст ва ҳадафи ҳамешагии дастаи “Истиқлол” ғалаба намудан аст. Пас аз анҷоми мавсими футбол дар соли 2017 дастаи “Истиқлол”-ро 7 футболбози калидиаш тарк намуд ва аз онҳо ду нафараш баргашт. Барои омода шудани мавсими нав ҳайати даста дар шаҳри Тошканди Ӯзбекистон тамринҳои омӯзиши ва санҷишӣ гузаронид. Дар ин муҳлат ба ҳайати даста ду футболбози беларусиро шомил намудем ва дар умум барои мавсими нав даста 85 фоиз омода аст,”.

Бошгоҳи “Хуҷанд”-и шаҳри Хуҷанд пас аз нокомӣ дар бозиҳои плей-оффи Ҷоми КФО-2018 ба ҳайаташ сармураббии нав Нуъмонҷон Юсуповро даъват намуд.

Мутахассисӣ 44 солаи тоҷик баъди ноком гардидани “Хуҷанд” дар бозии Ҷоми КФО-2018 рақобати фардоро барои дастааш муҳим ҳисобид:

- Дар се рӯз бо даста 3 машқҳои амалӣ гузаронидем ва албатта дар даста камбудиҳои хурд ҳаст,- таъкид намуд ӯ. - Футболбозони даста барои ба даст овардани Суперҷом хоҳиши баланди бозӣ намудан доранд. Ҳайати мураббиён кӯшиш менамоем, то футболбозонро руҳан омода намоем ва боварӣ дорам бозии фардо шавқовар мешавад.

Дидори ин ду тим фардо, 2- март, соати 16:00 дар Варзишгоҳи марказии шаҳри Ҳисор баргузор мегардад.

Сардоварии бозиро Беҳрӯз Муртазоев аз Душанбе ба уҳда дорад. Ба ӯ доварони канорӣ Ҳасан Каримов аз шаҳри Норак ва Ҳамза Шоймардонов аз ноҳияи Хуросон кӯмак мекунанд.

Маврид ба зикр аст, ки барои дарёти Суперҷоми Тоҷикистон дастаи қаҳрамони кишвар ва ғолиби Ҷоми Тоҷикистон маротибаи нуҳум рақобат хоҳанд кард. Аз ҳама бештар Суперҷомро дастаи “Истиқлол”-и шаҳри Душанбе шаш маротиба (2010, 2011, 2012, 2014, 2015, 2016) соҳиб гаштааст. Дастаи “Равшан”-и Кӯлоб як маротиба соли 2013 барои дарёфти ҷоми мазкур бошгоҳи “Регар-ТадАЗ”-и шаҳри Турсунзодаро дар майдони худ бо ҳисоби 2:1 шикаст дода, ҷомро соҳиб гардид. Соли 2017 дастаи “Ҳосилот”-и ноҳияи Фархор пас аз мағлубияти бозиҳои плей-оффи Ҷоми КФО бо тими “Истиқлол”-и шаҳри Душанбе барои дарёти Суперҷом бозӣ намуда бо натиҷаи 2:1 ғалаба намуд ва маротибаи аввал ҷоизаи мазкурро ба даст овард.

Ёдовар мешавем, соли гузашта барои дарёфти Суперҷоми Тоҷикистон тимҳои "Истиқлол"-и шаҳри Душанбе, қаҳрамон ва ҷоизадори Ҷоми Тоҷикистон ва "Ҳосилот"-и ноҳияи Фархор, гирандаи медалҳои нуқраи мусобиқаи қаҳрамонии кишвар-2016, рӯзи 4-уми март дар Варзишгоҳи марказии шаҳри Ҳисор рақобат намуда буданд.

Дар ин дидор дастаи “Ҳосилот”-и ноҳияи Фархор бо ҳисоби 2:1 пирӯз гардида буд.