Беҳрӯз Умаров рӯзи 5-уми октябр дар Бозиҳои III кишварҳои ИДМ (Иттиҳоди Давлатҳои Мустақил), ки дар Озарбойҷон ҷараён дорад, ба гирифтани нишони тилло мушарраф гардид.

Пас аз ба даст овардани нишони тиллои Беҳрӯз, шумораи нишонҳои варзишгарони тоҷик дар ин бозиҳо ба 18 медал (1 тило, 3 нуқра ва 14 биринҷӣ) расид.

Ягона медали тилоро Беҳрӯз Умаров дар риштаи бокс ба даст овард. Вай дар вазни то 50 кило дар финал мутзани узбек Азизбек Шокирҷоновро аз сари роҳ бардошта, мушарраф ба гирафтани мақоми аввал гардид.

Ба ҳайати дастаи мунтахаби Тоҷикистон дар Бозиҳои III кишварҳои ИДМ 142 варзишгар дохиланд, ки аз рӯи 18 навъи варзиш баромад мекунанд.

Се медали нуқраи Тоҷикистонро дар ин бозиҳо Юсуф Замонов дар риштаи ҷудо дар вазни то 50 кило, Аъзамҷон Ҳасанов (48 кг) ва Акбарҷон Абдуллоев (57 кг) ҳарду дар риштаи бокс гирифтанд.

14 медали биринҷӣ ба варзишгарони ҷавони тоҷик - Абдуҷаъфари Баҳодур (-54 кг) ва Нурулло Муродов (-74 кг) ҳарду дар намуди таеквондо WT, Назаралӣ Холов (-64 кг) ва Ёсин Ҳукуматов (-71 кг) ҳарду дар риштаи самбо, Идрис Баҳромов (-71 кг) ва Алиризо Баҳромов (-80 кг) ҳарду дар гӯштини озод, Дамир Назаров (-46 кг), Умарҷон Асроров (-66 кг), Амир Нозимов (-75 кг) ва Фурӯғ Сарҳадзода (-60 кг, миёни духтарон) ҳар чор дар риштаи бокс, Абубакр Худоиев (-55 кг) ва Лоиқ Қутбиддинов (-60 кг) ҳарду дар риштаи ҷудо, Муҳаммадӣ Раҷабов дар қаиқронӣ дар каноэ ба масофаи 200 метр, инчунин Ислом Носиров / Далер Носиров дар каноэи дукаса ба масофаи 200 метр марбут аст.

Бояд гуфт, ки дар ҳоли ҳозир аз ҳисоби медалҳо Русия бо касби 194 медал (105 тило, 55 нуқра ва 34 биринҷӣ) дар ҷойи аввал қарор дорад.

Мизбони мусобиқа Озарбойҷон бошад, бо касби 161 медал (29 тило, 46 нуқра ва 86 биринҷӣ) дар ҷойи дуюм ва Беларус бо касби 101 медал (27 тило, 26 нуқра ва 48 биринҷӣ) дар ҷойи сеюм қарор доранд.

Инчунин, Узбекистон бо касби 97 медал (21 тило, 28 нуқра ва 48 биринҷӣ) дар ҷойи чаҳорум, Қазоқистон бо касби 75 медал (9 тило, 22 нуқра ва 44 биринҷӣ) дар ҷойи панҷум, Қирғизистон бо касби 19 медал (1 тило, 13 нуқра ва 5 биринҷӣ) дар ҷойи шашум, Тоҷикистон бо касби 18 медал (1 тило, 3 нуқра ва 14 биринҷӣ) дар ҷойи ҳафтум мебошанд.

Покистон, Туркия ва Туркманистон бо яктоӣ медали биринҷӣ дар ҷойи ҳаштуманд. Варзишгарони кишварҳои Куба, Қувайт ва Умон то ҳоло медал нагирифтаанд.

Я. МАҲМАДНАБИЕВ, “ҶТ”