Муҳиддин Асадуллоев паҳлавони ҷавону умедбахши кишвар субҳи 7-уми октябр ба вақти Душанбе дар вазни то 73 кг дар Чемпионати ҷаҳон оид ба ҷудо байни ҷавонон дар шаҳри Лимаи Перу сазовори медали тилло гардид.

Дар рақобатҳои финалии мусобиқа Муҳиддин Асадуллоев бар ҷудокори ҷопони, Рюсей Аракава ғалаба карда, нишони зарринро ба гардан овехт.

Бояд гуфт, дастоварди Асадуллоев дар рақобатҳои ҷаҳонии гӯштин бори аввал нест, балки ӯ соли 2024 дар Чемпионати ҷаҳон оид ба ҷудо байни ҷавонон дар шаҳри Душанбе соҳиби медали биринҷӣ гардида буд.

Дар мусобиқа 463 ҷудочӣ (245 писар, 218 духтар) аз 65 давлати ҷаҳон иштирок доранд.

Дар Чемпионати ҷаҳони Лима байни ҷавонон Тоҷикистонро 4 ҷудокор намояндагӣ мекунад - Икром Шамсов дар вазни 60 кг, Ёсин Бобокалонов дар вазни 66 кг, Эҳсон Сафарзода дар вазни 66 кг ва Муҳиддин Асадуллоев дар вазни 73 кг.

Се нафари онҳо - Икром Шамсов дар вазни то 60 кг, Ёсин Бобокалонов ва Эҳсон Сафарзода (ҳарду) дар вазни то 66 кг дар рӯзи аввали мусобиқа дар марҳилаҳои гуногун ноком шуда, аз медалҳо бенасиб монданд.

Я. МАҲМАДНАБИЕВ, “ҶТ”