ВАРЗИШ
Якшанбе 26 Май 2024 08:21
9532
Дар доираи сабқатҳои чор рӯзи ахири Чемпионати Осиё оид ба гӯштини юнониву румӣ ва тарзи озод миёни наврасону ҷавонон, ки аз 12 то 20-уми июл дар кишвари Урдун баргузор гардид, чор варзишгари тоҷик - Шероз Очилов (вазни 72кг), Насимҷон Турдибеков (вазни 77кг), Қаюм Ҳалимов (вазни 57кг) ва Ҷаъфарбек Қурбонов (вазни 65кг) дучори шикаст гардиданд.

Дирӯз бошад, дар доираи рақобатҳои осиёии гӯштини тарзи озод миёни варзишгарони то 20-сола Муҳаммадамин Абдуллоев дар аввалин рақобати хеш дар вазни 74кг муқобили Муҳаммадниёз Авазбекови қирғиз бо ҳисоби 6-3 зафар ёфт ва ба даври чорякниҳоӣ роҳхат гирифт. Ӯ дар марҳилаи чорякниҳоӣ Сайф Абдулҳамид Дура аз кишвари Урдунро бо ҳисоби бузурги 11-0 шикаст дод.

Баъди ин пирӯзӣ варзишгари тоҷик ба марҳилаи ниманиҳоӣ роҳхат гирифт. Вале Абдуллоев дар даври ниманиҳоӣ аз варзишгари эронӣ Ҳусейн Аббос Муҳаммад Оғоӣ бо ҳисоби 4-11 шикаст хӯрда, бо медали биринҷии мусобиқа қадрдонӣ шуд.


Я. МАҲМАДНАБИЕВ, “ҶТ”

Эзоҳи худро нависед



Рамзҳо дар расм