“Варзиш мактаби обутоби ҷисмонӣ ва мардонагӣ буда, ҷавононро барои ҳимояи марзу бум, эҳтиром ба арзишҳои миллӣ, оромиву суботи кишвар ва ҳифзу таҳкими дастовардҳои бузурги давлатӣ ҳидоят мекунад. Танҳо ҷавонони солиму бардам, тавонову қавӣ ва далеру шуҷоъ меҳру муҳаббати Ватанро қадр карда, бо рӯҳияи баланди худшиносиву худогоҳӣ ва ватандӯстиву ватанпарварӣ амнияту оромӣ ва суботи кишварро таъмин карда метавонанд”.

Эмомалӣ РАҲМОН

Шерафкан рӯзи аввалини ба толор қадам монданашро ҳамеша ба ёд меорад ва саволи падар, ки “Мехоҳӣ ба толори варзишӣ равӣ?”, такрор ба такрор дар гӯшаш садо медод. Ӯ тамринҳои аввалини худро аз рӯи намуди таэквандо ВТФ дар назди мураббиаш Абдуқодир Муҳаммадҷонов оғоз намуд. Шерафкан бо тамоми шавқу завқ ба варзиш пардохт ва ҳар як гуфтаҳои устодашро саривақт ба ҷо меовард. Маҳз ҳамин шавқу завқ ва машаққатҳои зиёд ин ҷавонро бори нахуст болои гилеми рақобат овард. Соли 2014 дар мусобиқаи вилоятӣ, ки зери унвони “Субҳи Хатлон” баргузор гардид, дар вазни 53 кило мақоми дуюумро соҳиб гашт.

Ин дастовард ба ӯ роҳ ба мусобиқаи ҷумҳуриявиро кушод. Шерафкан дар мусобиқаи кушоди ҷумҳуриявӣ, ки дар шаҳри Хуҷанд баргузор гардид, медали биринҷиро ба гардан овехт. Ҳунарнамоӣ дар мусобиқаи ҷумҳуриявӣ боварии мураббиёнро нисбати ин варзишгари ҷавон зиёд гардонд. Баъдан ӯ дар мусобиқаи байналмилалӣ, ки дар шаҳри Боткенти Ҷумҳурии Қириғизистон баргузор гардид, Парчами кишварр дар зинаи сеюм муаррифӣ намуд. Ӯ инчунин дорандаи медали биринҷии мусобиқаи кушоди Осиё дар вазни 63 кило мебошад.

Шерафкан Маллаев соли 2000-ум дар деҳаи Бофандаи ноҳияи Бохтар ба дунё омадааст. Айни ҳол ӯ барои иштирок дар як мусобиқаи байналмилалӣ, ки моҳи августи соли равон дар шаҳри Оши Ҷумҳурии Қирғизистон баргузор мегардад, омодагӣ гирифта истодааст ва мо ба ин ҷавони далери Ватан муваффақиятҳои нав хоҳонем.

Сайраҳмон НАЗРИЕВ, рӯзноманигор