Қарзе, ки Фарзиншоҳ барои адои он қадами аввалро гузошт

14-16-уми октябр дар пойтахти Арманистон - шаҳри Ереван мусобиқаи қаҳрамонии самбои ҷаҳон миёни наврасону ҷавонон баргузор гардид. Дар ин мусобиқа варзишгари ҷавони кишвар Фарзиншоҳ Ҳусейнов дар рӯзи охири мусобиқа тавонист, дар рақобатҳо миёни навҷавонони 18-20-сола оид ба самбои варзишӣ медали тиллоро ба даст оварад. Доир ба пирӯзӣ ва роҳи тайнамудаи ин варзишгар суҳбате оростем.

- Пирӯзӣ эҳсосест бисёр гуворо ва хотирмон. Бинобар ин мехостам, суҳбатро аз замони пирӯзии шумо ва садо додани Суруди миллии Ҷумҳурии Тоҷикистон дар арсаи байналмилалӣ оғоз кунем. Чӣ ҳиссе доштед?

- Он эҳсосро бо ҳеҷ гуна сухан наметавон баён кард. Дар он лаҳзаҳои нотакрор ба худ ифтихор мекардам, ки тавонистам барои кишвари худ кореро карда бошам.

- Оё ба худ боварӣ доштед, ки дар мусобиқоти сатҳи байналмилалӣ сазовори мақоми аввал мегардед?

- Албатта бовар доштам. Шахсе, ки ба худ боварӣ надошта бошад, дар зиндагӣ шикаст мехӯрад. Ман аз аввали мусобиқа ба худ боварии комил доштам ва машқҳои худро ҳар рӯз беш аз пеш мекардам. Ба ақидаи ман, боварӣ боис шуд, то дар чемпионати ҷаҳон тавонам, мақоми аввалро ишғол созам.

- Барои гирифтани мақоми аввал ба шумо чӣ ё кӣ бештар руҳия мебахшид?

- Ҳар як шахсияте, ки дар қалби худ ҳисси ватандӯстӣ дорад, парафшон кардани парчами кишвари хешро дар миёни дигар давлату миллат қарзи шаҳрвандии худ меҳисобад. Баҳри расидан ба ин мақсад тамоми талоши худро хоҳад кард. Маро низ нангу номуси ватандорӣ водор сохт, то барои парафшонии парчами ин кишвари зебоманзар кореро ба сомон расонида бошам. Албатта, дар ин роҳ саҳми наздиконам низ ҳаст, бахусус падару модарам. Зеро боварии падару модар ба шахс як илҳоми аҷибе мебахшад, то барои расидан ба мақсади худ бештар талош намояд.

- Дар ин ҷода устоди шумо кист?

- Устоди ман Комроншоҳи Устопириён мебошанд. Хеле шодам, ки чунин устоди таҷрибадор дорам. Бо ҳамроҳии устод дар як толор тамрин мекунам ва он кас маро ба ин мусобиқа хеле хуб омода карда буданд. Ба қавли дигар мо якҷоя шуда аз уҳдаи ин масъулият баромадем. Заҳмату талоши худро зиёд кардем, ки хушбахтона натиҷаи дилхоҳро низ ба даст овардем.

- Ҳамсони кӣ шудан мехоҳед?

- Мехоҳам мисли устодам Комроншоҳи Устопириён шавам.

- То расидан ба қаҳрамонии ҷаҳон чӣ мушкилиҳоро паси сар намудед?

- Зиндагӣ худ пур аз мушкилиҳост. Ҳеҷ коре нест, ки дар он мушкилот ҷой надошта бошад. То расидан ба мақоми қаҳрамони ҷаҳон низ мушкилиҳо хеле зиёд буданд. Аммо ба он нигоҳ накарда, рақобатҳоро то ба даври ниҳоӣ идома додам. Чуноне, ки мебинед, ин ҳама талошҳо самар овард ва соҳиби ҷои аввал гаштам. Ман бо ёрии устодам тавонистам, дар миёни дигар кишварҳо Парчами Тоҷикистонро парафшон кунам. Бояд бо мушкилот мубориза бурд ва бар онҳо ғалаба кард, то дар ҳаёти минбаъда дар ҷомеа мавқеи худро касб намоем.

- Вақте сухан дар бораи мушкилот рафт, мехостам як чизро пурсон шавам. Шумо дар яке аз сабқатҳоятон каме осеб бардоштед. Пас чӣ гуна тавонистед, рақобатро идома диҳед?

- Бале, дуруст. Воқеан ҳам, аз поям сахт осеб дида будам. Ин ҳолатро устодам Комроншоҳи Устопириён тавассути телевизион дида буданд ва ба ман як чанд соат пеш аз сабқати ниҳоӣ паёмак доданд, ки “ту метавонӣ қаҳрамон гардӣ. Даст аз талош набардор ва ба роҳат идома деҳ. Ман ба ту боварӣ дорам”. Суханони устод боис шуд, то ман то охир қувваозмоиҳоро идома диҳаму таслим нагардам.

- Яъне аз ин ғолибият мамнуни Комроншоҳ ҳастед, ҳамин тавр?

- Бале

- Каме аз даврони кӯдакии худ нақл мекардед. Оё аз хурдӣ ба гӯштини самбо шавқу ҳавас доштед?

- Кӯдакии ман дар толори варзишии деҳаамон гузаштааст. Аз 5-6-солагиам инҷониб машқ мекунам. Аз замони хурдсолиам ба ин намуди варзиш меҳр доштам. Падарам, ки худ мураббии ин риштаи варзиш буданд, маро ҳамроҳи бародарам аз хурдӣ ба толори варзишии деҳа мебурданд ва ҳамин тавр дар қалби ман меҳр ба ин риштаи варзиш пайдо шуд.

- Айни замон ғайр аз варзишгар будан, дар ягон ҷой таҳсил мекунед?

- Бале. Айни замон донишҷӯи курси сеюми ихтисоси англисӣ-хитоии факултети забонҳои шарқии Донишгоҳи давлатии Хуҷанд ба номи академик Бобоҷон Ғафуров ҳастам.

- Нақшаҳои ояндаи шумо чӣ гуна аст?

- Ҳадафу мақсади натанҳо варзишгар, балки тамоми инсоният ин сазовор шудан ба дастовардҳои беш аз пеш дар соҳаи интихобкардаи хеш аст. Ман низ мехоҳам дар сабқатҳои дар пеш истода, омодагии ҷиддӣ дида, боз ҳам дар рақобатҳои сатҳи байналмилалӣ иштирок намоям ва парчамбардори миллати хеш бошам.

- Ба шумо муваффақият хоҳонем.

- Ташаккур!

Ҳошим РАҲМАТУЛЛОЕВ, "ҶТ"