Вазъияти баамаломадаи ҷаҳони муосир, хатару таҳдидҳои COVID-19 давоми соли ҷорӣ таъсирҳои манфии худро ба тамоми самтҳои фаъолияти ҷомеа аз ҷумла соҳаи варзиш низ расонид. Ҳамасола дар арсаи олам бо рушди соҳаҳои наву гуногуни варзиш чорабиниҳои зиёди сатҳи минтақавию байналмилалӣ доир карда мешуд, ки ба пешрафти соҳаҳои иҷтимоиву иқтисодии мамлакатҳои ҷаҳон манфиатрасони хуб буд.

Дар Тоҷикистони азизи мо низ баргузории чорабиниҳои сатҳи байналмилалӣ кам набуданд. Вале бинобар сабаби вазъи баамаломадаи ҷаҳони имрӯза, баргузории тамоми чорабиниҳои варзишӣ хусусан дар сатҳи ҷумҳурӣ давоми як муддат манъ гардиданд. Чуноне ки сардори Шуъбаи кор бо дастаҳои мунтахаби Кумитаи кор бо ҷавонон ва варзиши назди Ҳукумати Ҷуҳурии Тоҷикистон Суҳроби Акбаршо қайд карданд: “Дар давоми хатари баамаломада варзишгарон танҳо имкони дар хона тамрин намуданро доштанду халос, ки ин ба пешрафту муваффақияти варзишгарон таъсири калони манфӣ расонид. Шуруъ аз нимаи дуюми моҳи августи соли ҷорӣ бо қарори расмии Ситоди ҷумҳуриявӣ оид ба пешгирии COVID-19 дар Ҷумҳурии Тоҷикистон иҷозати баргузории чорабиниҳои варзишӣ дар доираи риояи қоидаҳои бехатарӣ дода шуд. Дар ин раванд, варзишгарон боз имкон пайдо карданд, ки дубора ба толору маконҳои варзишӣ баргашта, тамринҳои ҳамешагиро идома диҳанд”.

Хушбахтона тайи се моҳи охир дар сатҳи ҷумҳурӣ мусобиқаҳои гуногуни варзишӣ аз қабили футбол, волейбол, теннис ва инчунин чемпионати Ҷумҳурии Тоҷикистон оид ба ҷудо бахшида ба Рӯзи Президенти Ҷумҳурии Тоҷикистон бо риояи меъёрҳои бехатарӣ аз пандемияи ҷаҳонӣ доир карда шуданд. Аз ҷумла шуруъ аз 26-уми октябр то 10-уми ноябри соли ҷорӣ баҳри дарёфти ҷоми ташкилоти “Пайравони Пешвои миллат” миёни волонтёрони мактабҳои олӣ дар ҳудуди кишвар мусобиқаи футбол баргузор гардида, дар ин сабқат волонтёрони муассисаҳои олии кишвар маҳорати хуб нишон доданд.
Хушхабари дигар дар марҳилаи пандемия ин чор медали бадастовардаи паҳлавонони тоҷик дар сабқати ҷаҳонӣ аз рӯи гуштини самбо мебошад. Чемпионати мазкур миёни ҷавонон ва калонсолон 5-8 ноябри соли равон дар шаҳри Новий Сади Сербистон баргузор гардида, дар он 400 варзишгар аз 30 давлати дунё қувваозмоӣ карданд.

Баргузории чорабиниҳои варзишии марҳилаҳои интихобӣ, чемпионату мусобиқаҳои ҷумҳуриявӣ дар давраи карантинӣ давоми 9 моҳи соли ҷорӣ 1994 дар бар мегирад, ки дар онҳо 216165 нафар иштирок карданд.
  
Агар шароити имрӯзаи ҷаҳониро ба инобат гирем, новобаста аз он ки бисёре аз мусобиқаву чорабиниҳои варзишӣ дар раванди пандемия қатъ гардидаву бешатарашон ба таъхир гузошта шуданд, ҳамоно натиҷаҳо назаррасанд, чун аз 186 нафар варзишгарони иштирокдошта дар мусобиқаҳои сатҳи байналмилалӣ, варзишгарони мувваффақи мо ба хазинаи варзиши мамлакат 92 медал ворид намудаанд, ки аз ин шумора 27 медали тилло, 27 нуқра ва 38 биринҷӣ мебошад.
Лозим ба ёдоварист, ки то охири соли ҷорӣ баргузории боз як қатор чорабиниҳои варзишии сатҳи байналмилалӣ дар назар дошта шуда, имкони иштироки варзишгарон аз кишвари мо низ пешбинӣ гардидааст.

Қиёмиддин МАҲМАДҶОНОВ,
коромӯзи “ҶТ”