22 декабр, дар рӯзи охири мусобиқаи “Jerusalem Masters 2022” (сабқати устура ва ё устодони ҷудои ҷаҳон) ҷудокори сангинвазни тоҷик Темур Раҳимов медали нуқра ба даст овард.

Темур дар даври аввал озод буд ва рақобатро дар даври дуюм муқобили Ричард Сипоч аз Маҷористон оғоз кард. Дар ин нерусанҷӣ Темур тавонист, ки бо имтиёзи иппон муқобили Ричард зафар ёбад ва роҳашро ба даври чаҳорякниҳоӣ ҳамвор созад.

Дар даври чаҳорякниҳоӣ Темур бо ҷудокори озарӣ Ушанги Кокаури сабқат кард. Ин рақобат барои Темур мушкил паси сар шуд, зеро ҷудокори 30 солаи озарӣ то лаҳзаҳои охир хуб истодагарӣ кард. Аммо ин устувории Кокаури масири Темурро тағйир дода натавонист. Зеро дар ин сабқат Темур дастболо гардид ва роҳашро ба даври нимниҳоӣ ҳамвор кард.

Дар даври нимниҳоӣ рақиби Темур - Алишер Юсупов аз Ӯзбекистон гардид. Қаблан Темур дар финали мусобиқаи Гранд Слами Боку муқобили ин ҷудокори ӯзбек пирӯзӣ ба даст оварда, аввалин нишони тиллояшро соҳиб шуда буд. Дар рақобати дирӯза ҳам, Темур бо як боварию матонат тавонист, ки бо имтиёзи иппон муқобили Алишер зафар ёбад ва ба даври ниҳоии мусобиқа роҳ ёбад.

Дар даври ниҳоӣ Темур бо ҷудокори ҷопонӣ - Татсуру Саито сабқат намуд. Ва сазовори ҷойи дуюм гардид.

Ёдовар мешавем, ки Темур Раҳимов нахустин ҷудокори тоҷике мебошад, ки дар мусобиқаи “Masters” дастболо гардидааст.