Федератсияи футболи Тоҷикистон сар аз 4 июн фурӯши чиптаҳои бозии интихобии Ҷоми ҷаҳон-2026-ро ба роҳ монд. Дар ин бора сомонаи ФФТ хабар медиҳад.

Дар баёнияе, ки ФФТ дар саҳифааш гузоштааст, чунин омадааст: “Ба иттилои ҳаводорони футбол, ки мехоҳанд дар Душанбе дар бозии интихобии Ҷоми ҷаҳон-2026 миёни дастаҳои мунтахаби Тоҷикистону Покистон ширкат кунанд. Аз имрӯз чиптаҳои бозӣ дар хазинаҳои варзишгоҳи марказии Душанбе дастрасанд. Нархи як чипта 30 сомонӣ мебошад. Чиптаҳоро аз платформаи echipta.tj низ харидан мумкин аст”.

Ёдовар бояд шуд, ки бозии ниҳоии даври дуюми мусобиқаи интихобии Ҷоми ҷаҳон-2026 дар гурӯҳи “G” миёни тимҳои миллии Тоҷикистону Покистон рӯзи 11-уми июн соати 20:00 дар Варзишгоҳи марказии шаҳри Душанбе баргузор мешавад.