26-уми апрели соли ҷорӣ дар Қасри тенниси шафати Варзишгоҳи марказии шаҳри Душанбе бахшида ба Рӯзи пойтахт шашумин Мусобиқаи байналмилалӣ оид ба гӯштингирӣ барои дарёфти Ҷоми Раиси шаҳри Душанбе баргузор гардид.

Дар мусобиқаи мазкур 108 паҳлавон аз 25 кишвари ҷаҳон миёни мардон дар вазнҳои 65 кг, 78 кг, 95 ва +95 кг ва миёни бонувон танҳо дар вазни 70 кг иштирок карда, барои гирифтани мақомҳои ифтихорӣ талош намуданд. Тоҷикистонро дар ин мусобиқа 20 варзишгар намояндагӣ карданд. Ҳайати тими мунтахаби Тоҷикистонро дар мусобиқаи мазкур варзишгарони зерин ташкил карданд:

Миёни мардон: Муллораҷаб Халифаев, Суҳроб Боқиев, Муслимбек Каримов, Сарвар Абдушукуров - дар вазни 65 кг, Маҳмадшариф Наҷмиддинов, Раҳматуллобек Фарҳодов, Қоим Шукронов, Абубакр Боқиев - дар вазни 78 кг, Исроил Раҳимов, Улуғбек Раҳимов, Комроншоҳ Устопириён, Муҷиб Меҳробҷонзода – дар вазни 95 кг, Шакармамад Мирмамадов, Шарифҷон Назриев, Дадахон Қурбоналиев, Фирдавс Насимов – дар вазни +95 кг;

Миёни бонувон: Ҷонона Назарова, Шоҳида Қаландарова, Фазилат Гулбоева – дар вазни 70 кг.

Ҷоизаи умумии мусобиқа 110 ҳазор доллари амрикоиро ташкил дод. Ғолибони мақоми аввал ва медали тилло соҳиби 10 ҳазор доллар, ҷойи дуюм соҳиби 5 ҳазор доллар ва мақомҳои сеюм сазовори 2 ҳазору 500 доллари амрикоӣ гардиданд.

Дар умум варзишгарони мо соҳиби 9 медал гаштанд, ки аз ин миқдор 3 адади он тилло, 1 нуқра ва 5 биринҷӣ буд.

Беҳтарин баромадро миёни варзишгарони тоҷик паҳлавонони вазни 65 кг нишон доданд. Онҳо дар вазни худ ҳамаи мақомҳои ифтихориро ба даст оварданд. Аз ин миён Суҳроб Боқиев ба гирифтани унвони қаҳрамонӣ ва нишони заррин, Муллораҷаб Халифаев нишони нуқра ва Сарвар Абдушукуров бо Муслимбек Каримов медали биринҷии вазни худро соҳиб шуданд.

Дар вазни 78 кг низ баромади варзишгарони кишвар чандон бад набуд. Онҳо тавонистанд аз чор ҷойи ифтихорӣ дутои онро ба даст оваранд. Миёни паҳлавонони тоҷик аз ин вазн Маҳмадшариф Наҷмиддинов ба гирифтани мақоми аввал даст ёфт. Абубакр Боқиев варзишгари дигари тоҷик барандаи медали биринҷӣ дар вазни мазкур гардид. Ду варзишгари Узбекистон ҷойҳои боқимондаи ин вазнро ба даст оварданд. Умид Эсанов барандаи медали нуқра ва Аҳрор Зиёдуллоев медали биринҷиро моли худ кард.

Мутаассифона, дар вазни 95 кг ба варзишгарони тоҷик имкон даст надод, то ба мақомҳои ифтихорӣ ҷой пайдо кунанд. Мақомҳои ифтихориро дар ин вазн варзишгарон аз кишварҳои дигар соҳиб шуданд. Ҷонибек Казаков варзишгари узбек барандаи унвони қаҳрамонӣ дар вазни 95 кг гардид. Хусен Холмурзаеви рус медали нуқра ва Бека Гвиниашвилии гурҷию Озаранг Содиқи эронӣ мақомҳои сеюм ва медалҳои биринҷии мусобиқаро дар вазни 95 кг моли худ карданд.

Дар рақобатҳои вазнҳои охир миёни мардон аниқтараш вазни +95 кг паҳлавонони кишвар тавонистанд ба гирифтани ду медал даст ёфтанд. Шакармамад Мирмамадов миёни дигар варзишгарон ҳунарнамоии арзандатар нишон дода, ба гирифтани унвони қаҳрамонии шашумин Мусобиқаи байналмилалӣ оид ба гӯштингирӣ барои дарёфти Ҷоми Раиси шаҳри Душанбе даст ёфт. Шералӣ Ҷӯраев варзишгар аз Узбекистон дар ҳамин вазн аз Шакармамад Мирмамадов дар даври ниҳоии мусобиқа шикаст хӯрда, барандаи медали нуқра ва мақоми дуюм гашт. Ду ҷойи сеюмро дар вазни +95 кг Ҷавод Муродӣ аз Эрон ва Шарифҷон Назриев аз Тоҷикистон ба даст оварданд.

Миёни бонувон ягона медалро аз варзишгарбонувони тоҷик Шоҳида Қаландарова моли худ кард. Ӯ бо саъю талошҳои худ тавонист яке аз мақомҳои сеюми вазни худро ба даст оварад. Алена Прокопенко аз Русия барандаи медали тилло дар рақобат миёни бонувон гардид. Ганболд Гантсетсег аз Манголия барандаи медали нуқра ва Ажар Исрева аз Қирғизистон мақоми сеюмро дар баробари Шоҳида Қаландарова ба даст овард.

Қайд кардан ба маврид аст, ки паҳлавони номвари кишвар - Комроншоҳ Устопириён, ки соли гузашта корномаи варзишии худро дар риштаи ҷудо ба анҷом расонида буд, дигарбора ба майдони мусобиқот баргашт. Мусобиқаи байналмилалии гӯштингирӣ барои дарёфти “Ҷоми Раиси шаҳри Душанбе” аввалин сабқате буд, ки Комроншоҳ пас аз анҷоми корномаи варзишӣ дигарбора дар он иштирок кард. Ӯ дар мусобиқа дар вазни 95 кг ҳунарнамоӣ кард, аммо натавонист ба натиҷаи назаррас даст ёбад.

Ҳошим РАҲМАТУЛЛОЕВ, “ҶТ”