Мунтахабҳои Тоҷикистон, Тайланд, Ӯзбекистон ва Эрон бо ғалаба бар дастаҳои рақиб ба даври нимниҳоии мусобиқаи Ҷоми Осиё оид ба футзал роҳ ёфта, инчунин роҳхати иштирок дар Ҷоми ҷаҳонии футзал 2024-ро соҳиб шуданд.

Дастаҳои мунтахаб футзали Тоҷикистон дар даври ниманиҳоии Ҷоми Осиё-2024 бо тими мизбон - Тайланд - бозӣ мекунад. Ин бозӣ рӯзи ҷумъаи 26-уми апрел дар шаҳри Бангкок, дар варзишгоҳи Hua Mark Indoor доир мегардад.

Бояд гуфт, ки то расидан ба ин марҳила, дар бозии аввали марҳилаи чаҳорякниҳоӣ мунтахабҳои Тоҷикистон ва Афғонистон бо ҳам бозӣ карданд. Вохӯрии дастаҳо тулони давом карда, то ба вақти иловагӣ рафт. Ризо Ҳусейнпур аз ҳайати Афғонистон аввалин шуда дар бозӣ ҳисобро боз кард. Ӯ ба таври ногаҳонӣ тӯбро вориди дарвозаи худ намуд ва муаллифи худгол гардид. Дар идома Фарзод Маҳмудӣ ҳисобро баробар намуд. Беҳтарин бозигари тими мунтахаби Тоҷикистон – Файзалӣ Сардоров дар дақиқаҳои охири вақти илованамудаи довар аз пеналти гол зад ва ғалабаи миллипӯшони моро таъмин кард. Ин ғалаба аввалин бор дар таърих моро ба даври нимниҳоии Ҷоми Осиё баровард ва муҳимтар аз ҳама мо аввалин бор дар таърих ҳуқуқи иштирок дар Ҷоми ҷаҳонии футзалро ба даст овардем.

Бозии дигар миёни серҷоизатарин дастаи Осиё дар футзал - тими миллии Эрон бо Қирғизистон сурат гирифт. Дар ин вохӯрӣ футзалбозони Эрон бидуни мушкил бо ҳисоби бузурги 6 бар 1 муқобили Қирғизистон музаффарият ба даст оварданд.

Вохӯрии дигари марҳилаи чаҳорякниҳоӣ миёни дастаҳои Тайланд ва Ироқ доир шуд. Дар ин вохӯрӣ мизбонон камбэк карда, роҳхати марҳилаи нимниҳоиро соҳиб шуданд.

Ӯзбекистон охирин шуда, роҳхати марҳилаи нимниҳоиро соҳиб шуд. Кишвари ба мо дӯсту ҳамҷавор дар бозии охири ин марҳила муқобили Ветнам бо ҳисоби 2 бар 1 зафар ёфт.

Ҳамакнун, дар марҳилаи нимниҳоӣ мизбони мусобиқа тими миллии Тайланд бо Тоҷикистон бозӣ мекунад. Ӯзбекистон дар ин марҳила бо Эрон дар майдони рақобат хоҳанд шуд.

Қобили зикр аст, ки соли 2022 дар Ҷоми Осиёи Кувайт мо дар марҳилаи чаҳорякниҳоӣ дар сониҳои охир рақобатро аз Тайланд бохта будем ва ҳамакнун фурсати он расидаат, ки қасди бохтро аз ин тим ситонем ва ба финали Ҷоми Осиё роҳ ёбему боз таърихи наверо дар футзали тоҷик бо ҳарфҳои заррин ҳаккокӣ намоем.

Ёдовар мешавем, ки ҳама дастаҳои ба марҳилаи нимниҳоии мусобиқа роҳ ёфта, роҳхати иштирок дар Ҷоми ҷаҳонии футзал – 2024-ро, ки тирамоҳи имсол дар Ӯзбекистон барпо мегардад, ба даст оварданд.

Яҳё МАҲМАДНАБИЕВ, “ҶТ”