Шоми 19 июн, барои тамошои рақобати тимҳои миллии футболи Русия ва Миср варзишгоҳи “Санкт-Петербург” 65 ҳазор мухлисро дар худ ҷой намуд.

Ин дидор оғозбахши марҳилаи дуюми бозиҳои гурӯҳии Ҷоми ҷаҳон-2018 маҳсуб меёфт. Ҳарчанд қувваи дастаҳоро коршиносон ва мухлисон баробар пешгӯӣ менамуданд, аммо усули пешгирифтаи Станислав Черчесов сармураббии тими мунтахаби Русия ҳарифро маҷбур ба шикаст хӯрдан намуд.

Тими миллии Русия, ки аз соли 1994 инҷониб дар Чемпионати ҷаҳон иштирок менамояд, ягон маротиба ба даври 1/8 ниҳоӣ роҳхат нагирифтааст, (солҳои 1982, 1986, 1990 ин даста аз номи СССР баромад кардааст) аз ин лиҳоз дар ин бозӣ барои шогирдони Станислав Черчесов ғалаба мисли обу ҳаво лозим буд.

Вақте дар ҳайати асосии тими Миср Муҳаммад Салоҳ ворид шуд, ҳама мухлисон аз ин футболбоз бозии ҷолибу дидани интизор буданд, аммо дар чеҳраи ҳамлагари мисрӣ пас аз ҷароҳати бардоштааш дар финали Лигаи қаҳрамонҳо хастагӣ дида мешуд.

Аз сонияҳои аввал бартарии мизбонон ба назар мерасид ва пай дар пай хати ҳимояи рақибро рахна менамуданд. Ҳарчанд дар қисми аввал барои футболбозони ҳарду даста имкониятҳои голзанӣ фароҳам омада бошад ҳам, аммо комёб нагардиданд. Қисми аввал мусовӣ 0:0 хотима ёфт.

Қисми дуюми бозӣ барои соҳибони майдон бобарор оғоз гардид. Дар дақиқаи 47-ум аз фишори русҳо ҳимоятгарони Миср тоб наоварда, тӯбро вориди дарвозаи худ карданд. Муаллифи гол Аҳмад Фатоҳ дониста шуд. Пас аз 12 дақиқа нимҳимоятгари тими миллии Русия Денис Черишев голи дуюми дастаашро ба номаш сабт намуд. Гӯё барои ғалабаи футболбозони рус танҳо 15 дақиқа кофӣ буд, ки Артём Дзюба ҳамлагари бошгоҳи Русия дар дақиқаи 62-ум ҳисобро 3-0 намуд.

Сармураббии тими мунтахаби Миср Эктор Купер дар нишасти хабарӣ пас аз бозӣ 15 дақиқаи аз даст додаро чунин шарҳ дод: “Дар қисми аввал рақобати хуб нишон додем. Бозӣ 94 дақиқа идома намуд, мо танҳо 15 дақиқаро аз даст додем, ки ин сабабгори шикасти мо гардид”.

Дар дақиқаи 73-юм футболбозони рус муқобили Муҳаммад Салоҳ бозингари беҳтарини тими Миср дурушт бозӣ намуда, қоидаро вайрон карданд ва довари майдон Энрике Касереси аз Парагвай ба дарвозаи Русия зарбаи 11 метра таъин намуд. Ин имкониятро Муҳаммад Салоҳ хуб истифода бурда, аввалин голи хешро дар Ҷоми ҷаҳон ҷашн гирифт ва бозӣ бо ҳисоби 3:1 хотима ёфт.

Пас аз ин ғалаба дастаи миллии Русия бо касби 6 хол мавқеашро дар гурӯҳ қаввӣ намуд. Бозии дигари ин гурӯҳ шоми имрӯз, 20-уми июн миёни тимҳои мунтахаби Арабистони Саудӣ бар Уругвай доир мегардад. Рафту дар ин рақобат тими Уругвай ба ғалаба комёб гардад, дастаи Русия пеш аз муҳлат ба даври 1/8 ниҳоӣ роҳхат мегирад.

Ёдовар мешавем, ки мунтахаби Русия дидори нахустинашро бо тими Арабистони Саудӣ анҷом дода, бо ҳисоби 5-0 ғалаба намуд.

Бозии охирини тими мунтахаби Русия рӯзи 25 июн бар муқобили дастаи Уругвай доир мегардад.