13 апрел дар шаҳри Душанбе маросими кушодашавии расмии Мусобиқаи байналмилалии Ҷоми ҷаҳон оид ба велосипедронии кӯҳӣ - “Eliminator Mountain” баргузор гардид, ки дар расми ифтитоҳи он Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Бахтиёр Шарифӣ, муовини аввали раиси шаҳри Душанбе, роҳбарияти Федератсияи велесипедронӣ ва арзишгарон иштирок намуданд.

Мусобиқаи мазкур дар майдони "Дӯсти" - и пойтахт дар назди муҷассамаи шоҳ Исмоили Сомонӣ оғоз шуда, дар он 120 нафар варзишгар аз 40 кишвар иштирок доранд.

Ёдовар мешавем, ки мусобиқа бо ташаббуси Мақомоти иҷроияи ҳокимияти давлатии шаҳри Душанбе дар якҷоягӣ бо Федератсияи велосипедронии Тоҷикистон ва Кумитаи кор бо ҷавонон ва варзиши назди Ҳукумати Ҷумҳурии Тоҷикистон бо мақсади омода намудани варзишгарони муваффақ ва дарёфти чеҳраҳои нав барои иштирок дар мусобиқаҳои сатҳи баланд, тарғибу ташвиқи тарзи ҳаёти солим, баланд бардоштани маҳорату малакаи варзишии иштирокдорон, муаррифии фарҳангу тамаддун, имконияти сайёҳӣ ва оммавияту солимгардонӣ роҳандозӣ шудааст.

Ҳадафи ин мусобиқа оммавигардонии ин навъи варзиш, ҷалби сайёҳон ва таҳкими нуфузи Тоҷикистон ҳамчун созмондиҳандаи чорабиниҳои бузурги байналмилалӣ мебошад.