Қаҳрамони Тоҷикистон, дастаи “Истиқлол”-и шаҳри Душанбе дидори панҷуми худро дар доираи бозиҳои гурӯҳии Ҷоми КФО-2018 (Конфедиратсияи футболи Осиё) бо бошгоҳи “Аҳал”-и Туркманистон анҷом дода, бо ҳисоби 1-0 ғалаба намуд.

Дидори мазкур дар Варзишгоҳи “Ашқобот”-и Ҷумҳурии Туркманистон шоми 1 май ҷараён гирифт. Голи ягонаи рақобатро дар дақиқаи 52, сардори дастаи “Истиқлол” Фатҳулло Фатҳуллоев бо як маҳорати олӣ ба кунҷи дарвозаи ҳариф ворид намуд.

Тими “Истиқлол”-и шаҳри Душанбе бозии нахустинашро дар марҳилаи гурӯҳии Ҷоми КФО-2018 бар тими “Аҳал” баргузор намуда, бо ҳисоби 1:0 ғолиб омада буд.

Бозии дигари даври панҷуми гурӯҳи “D” рӯзи 2 май миёни дастаҳои “Алтин Асир”-и Туркманистон ва “Олой”-и Қирғизистон доир мегардад.

Ҳамин тариқ, баъди бозии даври паҷум дар гурӯҳи “D” дастаи “Истиқлол”-и шаҳри Душанбе бо 13 имтиёз дар ҷои аввал қарор гирифт. Тими “Алтин Асир” бо 8 хол (4 бозӣ) дар гурӯҳ мавқеи дуюмро касб намуда, бошгоҳи “Аҳал” бо 4 имтиёз дар ҷои сеюм ҷойгир шуд.

Ёдовар мешавем, ки марҳилаи гурӯҳии Ҷоми КФО-2018 дар минтақаи Марказӣ 16 май хотима ёфта, ба даври баъдӣ танҳо ғолиби гурӯҳ роҳ меёбад.

Пас аз хотимаи бозиҳои марҳилаи гурӯҳӣ бозиҳои ниманиҳоӣ ва ниҳоии байниминтақавӣ барпо мегардад. Бозии финалии Ҷоми КФО-2018 рӯзи 27 октябр соли ҷорӣ баргузор хоҳад шуд.

Даври 5-ум, 1-уми май

“Аҳал” (Туркманистон) – “Истиқлол” (Тоҷикистон) 0-1

2-юми май

“Алтин Асир” (Туркманистон) – “Олой” (Қирғизистон)

Даври 6-ум, 16-уми май

“Истиқлол” (Тоҷикистон) – “Алтин Асир” (Туркманистон)

“Олой” (Қирғизистон) – “Аҳал” (Туркманистон)