Дастаи яккачини наврасони 16-солаи Тоҷикистон дар даври ниҳоии чемпионати Осиё-2018 оид ба футбол аз ҳамсолони худ тими мунтахаби Ҷопон бо ҳисоби 1-0 мағлуб гардида, медалҳои нуқраи ин мусобиқаро ба гардан овехтанд.

Ин дидор, 7-уми октябр, дар Варзишгоҳи миллии Букит Ҷалили шаҳри Куала-Лумпури Малайзия баргузор шуд.

Футболбозони тоҷик, ки бори нахуст дар як гурӯҳ (бозии гурӯҳӣ 0-0) бо ин ҳариф рақобат намуда буданд, бо сабку услуби рақиби финалиашон ошно буданд. Дар қисми аввал барои шогирдони Зайниддин Раҳимов сармураббии тими мунтахаби 16-солаи кишвар чанд маротиба имкониятҳои голзанӣ муҳайё гардид. Аммо ин имкониятҳо ба наъфи дастаи Тоҷикистон хотима наёфт.
Қисми дуюм барои дастаи Ҷопон бо муваффақият анҷомид, дар дақиқаи 63-юм ҳамлагари ҷопонӣ Нишикава тӯбро вориди дарвозаи Муҳриддин Ҳасанов намуда, дастаашро маротибаи сеюм қаҳрамони Осиё кард.

Маврид ба зикр аст, ки чемпионати Осиё оид ба футбол миёни наврасони то 16-сола аз соли 1985 то инҷониб маротибаи 18-ум аст, ки баргузор мешавад. Ин маъракаи муҳими варзишӣ, инчунин мусобиқаи интихобии чемпионати ҷаҳон миёни наврасон (U-17) дониста мешавад.

Мусобиқаи қаҳрамонии Осиё-2018, ки аз 20-уми сентябр то 7-уми октябр дар ҷумҳурии Малайзия баргузор шуд, аз он 4 дастаи пурқуввати 16-солаи Осиё, дастаҳои Ҷопон, Тоҷикистон, Кореяи Ҷанубӣ ва Австралия роҳхати чемпионати ҷаҳон (U-17)-ро соҳиб гардиданд, ки соли оянда дар кишвари Перу баргузор мегардад.

Ёдовар мешавем, ки дар зери роҳбарии Зайниддин Раҳимов бори нахуст дар таърихи футболи кишвар наврасони 16-сола ба гирифтани медалҳои нуқраи чемпионати Осиё даст ёфтанд.

Аз ин пеш дастаи мунтахаби 16-солаи кишвар дар мусобиқаи қаҳрамонии Осиё, ки соли 2006 дар Сингапур доир гардида буд, бо шикаст додани дастаи яккачини Сурия ҷойи сеюмро соҳиб шуда буданд.

Аз соли 2008 ба баъд КФО (Конфедератсияи футболи Осиё) аз мусобиқаи чемпионати Осиё бозӣ барои ҷойи сеюмро аз байн гирифта, дастаҳо танҳо барои мақоми якуму дуюм рақобат менамоянд.