ВАРЗИШ
Шанбе 21 Сентябр 2019 08:28
6410
Аз 23 то 27 август дар шаҳри Душанбе X мусобиқаи байналмилалӣ оид ба теннис миёни наврасони то 17-сола барои дарёфти Ҷоми Президенти Ҷумҳурии Тоҷикистон баргузор гардид. 
 
Маросими расмии кушодашавии он 23 август – дар Қасри тенниси шаҳри Душанбе ҷараён гирифт. Дар ин чорабинӣ раиси Кумитаи кор бо ҷавонон ва варзиш Аҳтам Абдуллозода, намояндаи Дастгоҳи иҷроияи Президенти Ҷумҳурии Тоҷикистон Абдухолиқзода Лутфия сафирон ва намояндагони 10 давлати хориҷӣ аз қабили Афғонистон, Белорус, Канада, Қирғизистон, Покистон, Туркманистон, Тоҷикистон, Ӯзбекистон, Федератсияи Россия ва Иёлоти Муттаҳидаи Амрико ва варзишгарону дӯстдорони ин намуди зебои варзиш иштирок доштанд.

Абдухолиқзода Лутфия, сардори Раёсати илму маърифати Дастгоҳи иҷроияи Президенти Ҷумҳурии Тоҷикистон ва раиси Кумитаи кор бо ҷавонон ва варзиши назди Ҳукумати ҷумҳурӣ, Абдуллозода Аҳтам зимни кушодашавии мусобиқа варзишгарон ва иштирокдоронро табрику таҳният гуфта, барояшон дар рақобатҳо барору комёбӣ таманно намуданд.

Лутфия Абдухолиқзода баргузории мусобиқаи байналмилалии теннис миёни наврасон барои дарёфти Ҷоми Президенти Ҷумҳурии Тоҷикистонро дар доираи татбиқи сиёсати созандаи Президенти Ҷумҳурии Тоҷикистон, Пешвои миллат, муҳтарам Эмомалӣ Раҳмон ва Ҳукумати Ҷумҳурии Тоҷикистон басо рамзӣ хонда, гуфт, ки варзиш яке аз самтҳои афзалияноки сиёсати иҷтимоии давлату Ҳукумат интихоб гардидааст. 

- Албатта, нақш ва ҷойгоҳи Пешвои муаззами миллат дар рушди тарбияи ҷисмонӣ ва варзиш ифодакунандаи сиёсати мантиқии давлату ҳукумат ба таҳкими ҳаёти иҷтимоии ҷомеа, ки маҳаки асосии онро солимии миллат, ташвиқу таблиғи тарзи ҳаёти солим, таҳкими дӯстӣ ва тарғиби идеяи миллати солим ташкил медиҳад, асос меёбад. Баргузории мусобиқаи байналмилалӣ дар Ҷумҳурии Тоҷикистон барои дарёфти Ҷоми Президенти Ҷумҳурии Тоҷикистон ифодаи олии мавқеи устувори Ҷумҳурии Тоҷикистон дар рушди соҳаи варзиши кишвар ва ҷаҳон, инчунин таҳкими ҳаракати олимпии дунё мебошад. Тавре борҳо Пешвои муаззами миллат таъкид намудаанд: “Миллати ҷисман солим рӯҳан низ муқтадир ва шикастнопазир мебошад” ё “Варзиш беҳтарин воситаи муаррифӣ кардани давлату миллат мебошад”. 

Дар ин замина, бо мақсади рушди теннис дар ҷумҳурӣ бо Фармони Президенти Ҷумҳурии Тоҷикистон аз 19 марти соли 2005, №1535 нахустин мусобиқаи байналмилалӣ оид ба теннис миёни наврасон барои дарёфти Ҷоми Президенти Ҷумҳурии Тоҷикистон гузаронида шуд. Баъдан дар асоси қарори Ҳукумати Ҷумҳурии Тоҷикистон аз 21 июли соли 2006, №340 ҳамасола рӯзҳои 23-27 август дар шаҳри Душанбе мусобиқаи мазкур баргузор мешавад, ки имсол мо даҳсолагии онро якҷо бо Шумо таҷлил намуда истодаем.

Дар заминаи мусобиқаи мазкур, аз соли 2017 дар Ҷумҳурии Тоҷикистон тибқи тақвими Федератсияи байналмилалии теннис мусобиқаи байналмилалӣ оид ба теннис “Tajikistan Open” ва “Tajikistan tennis Federation Cup” доир мегарданд, ки ба рушди бемайлони ин намуди зебои варзиш мусоидат мекунад,- илова кард, Л. Абдухолиқзода.

Аҳтам Абдуллозода зимни баромадаш меҳмононро ба Тоҷикистони азиз хайрамақдам намуда, афзуд, ки маҳз зери роҳнамоии Пешвои муаззами миллат, муҳтарам Эмомалӣ Раҳмон дар кишвар ҳар сол баргузории 2 мусобиқаи байналмилалӣ барои дарёфти Ҷоми Президенти Ҷумҳурии Тоҷикистон оид ба теннис ва дзюдо, Ниммарафони байналмилалии Душанбе, мусобиқаҳои квалификатсионӣ оид ба теннис, оғози баргузории Ҷоми Пешвои миллат оид ба шоҳмот, баргузории машқҳои дастаҷамъонаи пагоҳирӯзӣ ҳар рӯзи шанбе бозгӯии олии таҳкими солимии ҷомеа, тарғибу ташвиқи тарзи ҳаёти солим ва рушди ҳаракати олимпии Тоҷикистон ба ҷомеаи ҷаҳон мебошад. “Боварии комил дорам, ки мусобиқаи имсола низ дар замири варзишгарони навраси 10 давлати дунё дӯстиву рафоқат, якдиливу ҳамбастагӣ ва чеҳраҳои нави варзиши теннисро ба арсаи байналмилалӣ муайян ва пешкаш менамояд. Баргузории мусобиқаи байналмилалӣ дар Ҷумҳурии Тоҷикистон барои дарёфти Ҷоми Президенти Ҷумҳурии Тоҷикистон ифодаи олии мавқеи устувори Ҷумҳурии Тоҷикистон дар рушди соҳаи варзиши кишвар ва ҷаҳон, инчунин таҳкими ҳаракати олимпии дунё мебошад,-гуфт, А. Абдуллозода. 

Пас аз суханони ифтитоҳии намояндагони расмии мақомоти дахлдор қисмати фарҳангии мусобиқа шуруъ гардид. Дар ин қисмат овозхонон ва ҳунармандони ҷавони кишвар бо забони тоҷикӣ ва баъзе забонҳои варзишгарони иштирокдори мусобиқа суруду таронаҳо сароиданд. Баъд аз анҷоми қисмати фарҳангӣ ва садо додани Суруди миллии Ҷумҳурии Тоҷикистон ба мусобиқа оғози расмӣ бахшиданд. Дар нахустин бозӣ Яҳёева Наргиза варзишгари тоҷик ва Моҳинур Шарипова варзишгари ӯзбекистонӣ бо ҳам рақобат карданд.

Ҳамин тариқ давоми 5 рӯз варзишгарони 10 давлати дунё аз қабили Ҷумҳурии Исломии Афғонистон (4-нафар), Белорус (1-нафар), Канада (1-нафар), Қирғизистон (4-нафар), Ҷумҳурии Исломии Покистон (2-нафар), Туркманистон (7-нафар), Тоҷикистон (35-нафар), Ӯзбекистон (8-нафар), Федератсияи Россия (як нафар) ва Иёлоти Муттаҳидаи Амрико ( як нафар) бо ҳам рақобат карданд.

Дар рӯзи панҷум Муҳиддинов Абдураҳим, сардовари мусобиқа ва ҳайати доварон натиҷаи ниҳоӣ ва ғолибони мусобиқаро чунин муайян намуданд.

Инфиродӣ писарон

Ҷои якум:
Шарифов Иссамҷон (Тоҷикистон)

Ҷои дуввум:
Мороз Даниела (Белоруссия)

Ҷои саввум:
Абдуллоев Аминҷон (Тоҷикистон)

Инфиродӣ духтарон

Ҷои якум: 
Шарипова Моҳинур (Ӯзбекистон)

Ҷои дуввум: 
Яҳёева Наргизахон (Тоҷикистон)

Ҷои саввум:
Иванихина Диана (Тоҷикистон)

Писарон даставӣ

Ҷои якум:
Шарифов Иссамҷон – Абдуллоев Аминҷон (Тоҷикистон)

Ҷои дуввум:
Мороз Даниела (Белоруссия) – Исроилов Бахтиёр (Тоҷикистон)

Ҷои саввум:
Саидмуродов Тошпулод – Айёмбеков Маратшо (Тоҷикистон)

Духтарон даставӣ

Ҷои якум: 
Яҳёева Наргизахон - Иванихина Диана (Тоҷикистон)

Ҷои дуввум: 
Тухтаева Сумая – Шерхонова Амина (Тоҷикистон)

Ҷои саввум:
Облоқулова Умия (Тоҷикистон) – Шарипова Моҳинур (Ӯзбекистон)

Маросими пушидашавии мусобиқа 27 август дар “Қасри теннис” бо иштироки муовинони раиси Кумитаи кор бо ҷавонон ва варзиш, роҳбарияти Федератсияи тенниси Тоҷикистон, ва ҳайати доварону дигар намояндагон баргузор гардид.
Тибқи натиҷаҳои ниҳоии бадастомада ба ғолибони мусобиқа туҳфаҳои хотиравӣ- диплом, медал ва маблағ супорида шуд.  Дастандаркорони мусобиқа ба ғолибон 1000 доллари ИМА, барандагони ҷои дуюм 800 доллар ва ҷои сеюм 500 доллари ИМА тақдим намуданд.


Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
26 27 28 29 30 31 1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 1 2 3 4 5 6

Сентябр 2019 c.