Мусобиқаи IV байналмилалӣ оид ба ҷудо барои дарёфти Ҷоми Президенти Ҷумҳурии Тоҷикистон бо пирӯзии паҳлавони украинӣ Станислав Бандаренко хотима ёфт. Ҷои дуюмро варзишгари кубагӣ Гарсия Мендоза ва ду ҷои сеюмро паҳлавонони ӯзбекистонӣ Муҳсин Кисомиддинов ва Абдулло Тангриев ба даст оварданд.



Дар расми ифтитоҳи мусобиқа раиси шаҳри Ваҳдат Амирзода Раҳмоналӣ ва муовини раиси Кумитаи ҷавонон, варзиш ва сайёҳӣ Дилшод Назаров ба варзишгарон барор хостанд. 



Дар мусобиқа, ки дирӯз, 5 октябр, дар Варзишгоҳи “Хайр”-и шаҳри Ваҳдат баргузор гардид, 45 варзишгар аз ҷумҳуриҳои  Афғонистон, Белорус, Италия, Непал, Куба, Озорбойҷон, Покистон, Русия, Ӯзбекистон, Украина, Ҷопон, Эрон, Қазоқистон, Қирғизистон ва Тоҷикистон ширкат доштанд.

Мусобиқаро доварони сатҳи ҷаҳонӣ аз Афғонистон, Ӯзбекистон ва Тоҷикистон ҳакамӣ намуданд.  

Ғолиби мусобиқа соҳиби 56 ҳазор сомонӣ, ҷои дуюм 32 ҳазор сомонӣ ва ҷои сеюм сазовори 16 ҳазор сомонӣ гардиданд. Ҳамзамон, ба ғолибон “Сипоснома” ва тӯҳфаҳои хотиравӣ тақдим карда шуд.