10-11 сентябр се бозии даври чорякниҳоии Ҷоми Тоҷикистон оид ба футбол баргузор шуд. Дастаҳои “Ҳосилот”, “Равшан” ва “Истиқлол” ба даври нимфинал роҳ ёфтанд.

Бозӣ миёни дастаҳои “Барқчӣ” ва “Ҳосилот” мусовӣ анҷом ёфт – 2:2. Ҳисобро дар дақиқаи дуюм бозингари меҳмонон Иброҳим Рабимов кушод. Дар қисми дуюм баъд аз голҳои Азиз Бегов ва Кароматулло Саидов тими мизбон ба пеш баромад. Вале дар дақиқаи 66 Соҳиб Саванқулов ба дарвозаи дастааш гол зада, ҳисобро баробар кард. Аз ҳисоби ғалабаи бозии аввал (4:2) “Ҳосилот”-и Фархор ба даври дигар роҳ ёфт. Дар даври нимфинал ҳарифи “Ҳосилот” ғолиби ҷуфти “Хуҷанд”-“Регар” хоҳад буд. Бозии ин дастаҳо 27 сентябр ба нақша гирифта шудааст.

Дар бозии дигар “Равшан” бар дастаи лигаи якум “Ваҳдат” бо ҳисоби 2:0 ғалаба кард. Голҳоро Аквела Канкама (43-юм дақиқа) ва Ширин Наимов (77) заданд. Бозии аввали дастаҳо дар шаҳри Ваҳдат мусовӣ – 0:0 анҷом ёфта буд.

Дар бозии дигари ҷавобӣ “Истиқлол” ба дарвозаи дастаи “Хайр”-и Ваҳдат 3 голи беҷавоб зада, бо ҳисобии умумии 4:1 (бозии аввал – 1:1) ба даври нимниҳоӣ баромад. Дар ин давр “Истиқлол” бо “Равшан” вомехурад.