Тими миллии кишвар омодагиро барои рақобатҳои муқаддамотии Ҷоми Осиё-2019 28 август оғоз намуд.

Тибқи иттилои сомонаи Федератсияи футболи Тоҷикистон Ҳаким Фузайлов, сармураббии мунтахаби миллии футболи Тоҷикистон, рӯйхати бозингаронеро, ки барои омодагии даста ба бозии даври севуми мусобиқаи интихобии Ҷоми Осиё-2019 муқобили мунтахаби Непал даъват шудаанд, эълон кард.

Ба дастаи мунтахаб 22 бозингар – 3 дарвозабон, 9 ҳимоятгар, 8 нимҳимоятгар ва 2 ҳамлагар, даъват шудаанд. Аз миёни онҳо 4 нафар легионер – дарвозабон Абдуазиз Маҳкамов (“Олой”, Қирғизистон), ҳимоятгарон Искандар Ҷалилов (“Балтика”, Русия) ва Давронҷон Эргашев (“Тараз”, Қазоқистон), инчунин нимҳимоятгар Парвизҷон Умарбоев (“Локомотив”, Булғористон) мебошанд.

Барои омода шудан тими миллӣ бозии санҷишии худро бо кулубҳои ҷумҳурӣ 31 август дар майдони эҳтиётии Варзишгоҳи маркази шаҳри Душанбе мегузаронад.

Бозии даври сеюми мусобиқаи интихобии Ҷоми Осиё-2019 дар гурӯҳи “F” миёни дастаҳои мунтахаби Непал ва Тоҷикистон 5 сентябр дар Катманду соати 15:00 ба вақти маҳаллӣ (соати 14:15 ба вақти Душанбе) оғоз меёбад.

Ҳайати дастаи мунтахаби миллии Тоҷикистон муқобили Непал:

Дарвозабонҳо: Абдуазиз Маҳкамов (“Олой”, Қирғизистон), Қурбоналӣ Бобоев (“Истиқлол”), Рустам Ризоев (“Хуҷанд”);

Ҳимоятгарон: Искандар Ҷалилов (“Балтика”, Русия), Давронҷон Эргашев (“Тараз”, Қазоқистон), Ромиш Ҷалилов, Сиёвуш Асроров, Аҳтам Назаров, Табрези Давлатмир, Ойбек Абдуғаффоров (“Истиқлол”), Фирдавс Чақалов, Зоир Ҷӯрабоев (ССКА “Помир”);

Нимҳимоятгарон: Парвизҷон Умарбоев (“Локомотив”, Булғористон), Ҷаҳонгир Алиев, Муҳаммадҷони Ҳасан, Амирбек Ҷӯрабоев, Фатҳулло Фатҳуллоев, Эҳсони Панҷшанбе (“Истиқлол”), Ҷаҳонгир Эргашев, Хуршед Бекназаров (“Хуҷанд”);

Ҳамлагарон: Манучеҳр Ҷалилов, Дилшод Восиев (“Истиқлол”).

Сармураббӣ Ҳаким Фузайлов.

Шодихони НАЗАР, “ҶТ”