27-уми сентябр, дастаи яккачини наврасони кишвар оид ба футбол рақобати ниҳоии худро дар марҳилаи гурӯҳии чемпионати Осиё-2018 миёни 16-сола доир намуд.

Дар ин дидор шогирдони Зайниддин Раҳимов, сармураббии тими Тоҷикистон ҳамсолони худ - дастаи Тайландро бо ҳисоби 2-1 шикаст дода, ба даври чорякниҳоӣ роҳ ёфтанд.

Футболбозони навраси тоҷикро, ки пас аз ду рақбат бо як имтиёз дар зинаи чорум қарор доштанд, барои идома додани мусобиқа танҳо ғалаба зарур буд. Дар дақиқаи 39-ум футболбози тоҷик Озодбек Панҷиев голи нахустини бозиро ба сомон расонида, дастаашро пешсаф намуд.

Дар дақиқаи 81-уми қисми дуюми бозӣ футболбозони тайландӣ аз зарбаи ҷаримавӣ ҳисобро баробар карданд. Муаллифи гол Супҳанат Муеанта дониста шуд.

Пас аз се дақиқа Ислом Зоиров бо зарбаи сар голи дуюми тими мунтахаби Тоҷикистонро ба ҳадаф расонида, ғалабаи дастаашро таъмин кард.

Бозии дигари даври сеюми гурӯҳи “А” мунтахаби наврасони Ҷопон бар соҳибони майдон тими Малайзия бо ҳисоби 2:0 пирӯз шуда, ба даври минбаъда роҳхат гирифтанд.

Ёдовар мешавем, тими яккачинӣ наврасони Тоҷикистон дар бозии нахустини гурӯҳии марҳилаи ниҳоии қаҳрамонии Осиё аз тими Малайзия бо ҳисоби 2:6 шикаст хӯрда, рақобати дуюми худро бо дастаи миллии Ҷопон мусовӣ анҷом дода буд.

Пас аз натиҷагирии мусобиқа дар гурӯҳи “А” дастаи Ҷопон бо ҳафт хол ва мунтахаби Тоҷикистон бо чор имтиёз зинаҳои якуму дуюмро касб намуда, ба даври чорякниҳоӣ роҳхат гирифтанд.

30-юми сентябр дар даври чорякниҳоӣ дастаи мунтахаби наврасони Тоҷикистон (U-16) бо ғолиби гурӯҳӣ “В” Кореяи Шимолӣ рақобат менамояд.

Маврид ба зикр аст, ки чор дастаи беҳтарини чемпионати Осиё-2018 соҳиби роҳхат ба қаҳрамонии ҷаҳон-2019 (U-17) мешавад, ки дар Перу барпо мегардад.