Дастаи яккачини наврасони кишвар оид ба футбол рақобати дуюми худро дар марҳилаи ниҳоии қаҳрамонии Осиё-2018 бо тими Ҷопон бо ҳисоби 0:0 анҷом дод.

Бозии мазкур 23 –юми сентябр дар варзишгоҳи “UM Arena”-и шаҳри Куала-Лумпури Малайзия баргузор шуд.

Дар бозии дигари гурӯҳи “А” мунтахаби наврасони Тайланд ҳамсолони худ тими Малайзияро бо ҳисоби 4:2 шикаст доданд.

Ёдовар мешавем, шогирдони Зайниддин Раҳимов сармураббии тими 16-солаи кишвар дар рақобати аввал, ки 20-уми сентябр ҷараён гирифта буд, аз соҳибони майдон, тими Малайзия бо ҳисоби 6-2 мағлуб гардида буданд.

Баъди натиҷагирии даври дуюми мусобиқа мунтахаби наврасони Ҷопон бо чор хол садрнишини гурӯҳи “А” мебошад. Дастаҳои Тайланд ва Малайзия бо се имтиёзӣ зинаҳои дуюму сеюмро ишғол кардаанд. Мунтахаби наврасони Тоҷикистон бо як имтиёз дар ҷойи чорум қарор дорад.

Барои дастпарварони Зайниддин Раҳимов ҳанӯз имкони ба даври чорякниҳоӣ роҳ ёфтан аз даст нарафтааст. Дар ҳолати дар марҳилаи ниҳоии бозиҳои гурӯҳӣ 26 сентябр тими Тайландро шикаст додан ва ҳамчунин мунтахаби Ҷопон тими Малайзияро шикаст диҳад, мунтахаби Тоҷикистон ба даври чорякниҳоӣ роҳ меёбад.

Марҳалаи ниҳоии қаҳрамонии футболи Осиё-2018 миёни наврасони то 16-сола аз 20 сентябр то 7 октябр дар Малайзия идома меёбад.

Маврид ба зикр аст, ки чор дастаи беҳтарини чемпионати Осиё-2018 соҳиби роҳхат ба қаҳрамонии ҷаҳон-2019 (U-17) мешавад, ки дар Перу барпо мегардад.