Бо ҳадафи ташвиқу тарғиби тарзи ҳаёти солим, баланд бардоштани маҳорати касбии варзишгарон ва муайян намудани дастаи мунтахаби ВМКБ дар шаҳри Хоруғ мусобиқаи кушоди вилоятӣ аз намуди гӯштини ҷудо баргузор гардид.

Мусобиқа бо иқдоми Раёсати кор бо ҷавонон ва варзиши вилоят байни наврасону ҷавонони соли таваллудашон 2001 – 2003, 2004 – 2007 ташкил шуда, варзишгарон аз рӯи 10 вазн байни ҳам рақобат намуданд.

Бино ба иттилои сардори раёсат Сураҷ Чоршанбиев, дар умум зиёда аз 460 нафар паҳлавонони беҳтарини шаҳру ноҳияҳои вилоят бо ҳам қувваозмоӣ карда, ғолибон бо туҳфаҳои хотиравӣ ва медалу ифтихорнома сарфароз гардонида шуданд.

Аз рӯи натиҷаҳои охир дар ҳайати даставӣ варзишгарони Хоруғ сазовори ҷои як ва Рӯшону Ванҷ бошад зинаҳои дуюму сеюмро ба даст оварданд.