Дар доираи корҳои ободониву созандагӣ ба ифтихори ҷашни 35-солагии Истиқлоли давлатӣ дар шаҳру деҳоти Панҷакент иншооти соҳаи варзиш бунёд ва мавриди баҳрабардорӣ қарор дода шуд.

Аз ҷумла, дар деҳаи Зери Ҳисори деҳоти ба номи Абӯдабдулоҳ Рӯдакии шаҳри Панҷакент толори варзишӣ ба истифода дода шуд. Иншооти мазкур дар назди муассисаи таҳсилоти миёнаи умумии №52 бо саҳми соҳибкор бунёд гардида, минбаъд фарзандони ин диёр дар шароити муносиб ба варзиш машғул мешаванд.

Инчунин, дар деҳаи Ғусари деҳоти ба номи Лоиқ Шералӣ майдончаи варзишии замонавӣ, ки аз ҷониби соҳибкори маҳаллӣ Парвиз Алибеков бо харҷи беш аз 200 ҳазор сомонӣ бунёд гардидааст, мавриди баҳрабардорӣ қарор гирифт. Ҳамчунин, дар назди осоишгоҳи “Шифо” майдончаи варзишии замонавӣ, ки бо саҳми соҳибкори ватандӯст сохта шудааст ба истифода дода шуд.

Иншооти ҷашнӣ дар пайравӣ ба ташаббусҳои созандаи Пешвои миллат муҳтарам Эмомалӣ Раҳмон бо саҳми соҳибкорон бунёд гардида, ба рушди варзиш ва оммавияти он мусоидат мекунад.

Субҳиддин ҚОДИРОВ, “ҶТ”