Дирӯз дар доираи чорабиниҳои Фестивали байналмилалии ҷавонон, ки дар минтақаи “Сириус” (Парки олимпӣ) -и шаҳри Сочии Федератсияи Русия аз 1 март ҷараён дорад, бозии дӯстона оид ба футбол миёни дастаҳои Тоҷикистон ва Бангладеш аз ҳисоби иштирокчиёни фестивал баргузор гардид.

Бозии мазкур хеле хуб сурат гирифта, дар натиҷа дастаи Тоҷикистон ба дастаи Бангладеш пирӯзӣ ба даст овард.

Ёдовар мешавем, ки дар Фестивали байналмилалии ҷавонон аз Тоҷикистон 275 нафар мутахассисони ҷавони соҳаҳои гуногун, кормандони вазорату идораҳо, дипломатҳо, соҳибкорон, ходимони илму маориф, варзишгарон, масъулини мақомоти маҳаллӣ, намояндагони ВАО, волонтёрон ва намояндагони ҷавони дигар қишрҳои фаъоли ҷамъиятӣ аз 18 то 35-сола иштирок карда истодаанд.

Ин Фестивал бузургтарин чорабинии ин қишри ояндасоз дар ҷаҳон ба шумор меравад, ки бо фармони Владимир Путин Президенти Федератсияи Русия аз 1 то 7 март баргузор мешавад.

"ҶТ"