Президенти Конфедератсияи футболи Осиё Шайх Салмон бин Иброҳим Ал-Халифа, пас аз дигарбора ба мақоми президенти Федератсияи футболи Тоҷикистон интихоб шудани Рустами Эмомалӣ, ӯро табрик гуфт.

Дар ин бора сомонаи расмии ФФТ хабар медиҳад.

Бино ба иттилоъ, Иброҳим дар номаи шодбошии худ аз президенти ҷавони Федератсияи футболи Тоҷикистон умедвориҳои зиёд намуда, ояндаи футболи тоҷикро дурахшон арзёбӣ намудааст.

“Муҳтарам президент, ман аз дигарбора интихоб шуданатон ба вазифаи президенти Федератсияи футболи Тоҷикистон хушнуд шудам. Интихоби якдилонаи шумо барои солҳои 2024-2028 дар Конгресс далели эътимод ва боварии оилаи футболи Тоҷикистон ба шумо ва дурнамоятон дар рушди минбаъдаи варзиши маҳбуб дар кишвари зебои шумост. Лутфан, табрикоти самимии маро қабул кунед ва итминон дошта бошед, ки ташаббусҳои шумо аз ҷониби ман ва Конфедератсияи футболи Осиё ҳамаҷониба дастгирӣ меёбанд.

Шубҳае надорам, ки шумо минбаъд низ дар рушди футболи Тоҷикистон саҳми арзанда мегузоред. Умедворам, ки ба зудӣ бо шумо вомехӯрам ва дар роҳи боз ҳам беҳтар кардани сатҳи футбол дар Осиё ҳамкориҳои зич хоҳем дошт”, – омадааст дар номаи расмии президенти Конфедератсияи футболи Осиё Шайх Салмон бин Иброҳим Ал-Халифа ба унвонии президенти Федератсияи футболи Тоҷикистон Рустами Эмомалӣ.

Ёдовар мешавем, ки 14 декабр дар шаҳри Душанбе Конгресси ҳисоботӣ-интихоботии Федератсияи футболи Тоҷикистон баргузор гардид. Раиси Маҷлиси миллии Маҷлиси Олии Ҷумҳурии Тоҷикистон, раиси шаҳри Душанбе муҳтарам Рустами Эмомалӣ ба муҳлати чор соли дигар президенти Федератсияи футболи Тоҷикистон интихоб гардид.

Яҳё МАҲМАДНАБИЕВ, “ҶТ”