ВАРЗИШ
Душанбе 30 Январ 2023 12:24
9139
Агар хонандаи ин сатрҳо савол диҳад, ки “оё месазад Темур Раҳимовро ситораи варзиш номид?”, мо мегӯем, ки бале. Одитарин далелаш ин аст, ки Темур дар ҷавонияш қуллаҳоеро паймуда истодааст, ки барои баъзе аз паҳлавонон даҳсолаҳо камӣ мекунад, то ба дастовардҳои ӯ даст ёбанд. Пурҷилотарин дас-товарди навбатии ӯ медали тилло аз мусобиқаи “Baku Grand Slam-2022” мебошад, ки моҳи ноябри соли равон доир шуд.

Дар даври ниҳоии ин мусобиқаи бештар аз як дақиқа то анҷоми вақти сабқат монда буд, ки Темур роҳи дурустро ёфт ва ба сабқат бо усули “о-учи-гарӣ” иппони азим нуқта гузошт. Ӯ ҷудочии узбекро ба дастонаш печонда, ба фарш зад ва номи худро дар таърихи ҷудои кишвар бо ҳарфҳои заррин сабт намуд.

ШИНОСНОМАИ ПАҲЛАВОН

Ӯ зодаи ноҳияи Рӯдакист. 25 сол дорад. Чун синнаш ба ҳафт мерасад, модар ӯро ба мактаби №1-и зодгоҳаш, ки худ он ҷо ба таълими насли наврас машғул буд, мебарад. Темур баъди хатми мактаби миёна соли 2014 ба факултети сайёҳӣ ва кӯҳии Донишкадаи тарбияи ҷисмонии Тоҷикистон ба номи С. Раҳимов ҳуҷҷат супорида, онро соли 2018 сарбаландона хатм намудааст.

Темур чун паҳлавон аз гӯштинҳои ҷашнҳои миллӣ кашф гардидааст. Агар ба гузаштааш назар кунем, аён мегардад, ки ӯ тасодуфан ба олами гӯштин наомадааст. Зеро падараш Бахтиёр Раҳимов, бобояш Рустам Абдураҳмонов ва тағояш Суҳроб Абдураҳмонов гӯштингирони номдори рустоҳои хеш буданд. Хусусан, бобои модариаш Рустам Абдураҳмонов, ки зодаи Раштонзамин буд, дар ин минтақа чун паҳлавони номдор шинохта мешуд ва зиёд мехост, ки роҳи то охир напаймудаашро маҳз Темур идома бахшад.

Барои ба сатҳи як паҳлавони касбӣ расидани Темур нақши бобояш Рустам Абдураҳмонов хело бузург аст. Бобои Темур ва паҳлавони соҳибмактаб шодравон Худойназар Боқиев дӯстони қарин буданд ва бобояш дас-ти Темурро гирифта, ӯро ба таълимгоҳи Боқиевҳо мебарад. Шуруъ аз 7-солагӣ то имрӯз Темур дар мактаби Боқиевҳо машқу тамрин мекунаду нозукиҳои гӯштинро меомӯзад.

Ба майдонҳои касбӣ роҳ ёфтани Темур ба соли 2012 рост меояд, ки дар чемпионати ҷумҳуриявӣ сазовори мақоми сеюм гардид ва соли 2013 бошад, дар ҷоми Вастан сазовари ҷойи аввал. Инчунин ҳамон сол дар чемпионати Тоҷикистон дар вазни 90 кг ба гирифтани медали тилло мушарраф гардида, мақоми аввали Бозиҳои осиёиро, ки Алмаатои Қазоқистон мизбонӣ мекард, ба номаш муҳр зад. Соли 2014 боз ҳам мавсими бобарореро Темур паси сар намуд, зеро дар ин сол мавсуф дар ҷоми аврупо, ки дар шаҳри Анталияи Туркия гузашт, ба гирифтани нишони биринҷӣ даст ёфт.

КОРНОМА

Соли 2015 барои Темур бо иллати бардоштани ҷароҳати зону бебарор оғоз гардид. Ӯ дар ин мавсим ҳадафҳои зиёде назди худ гузошта буд, аммо бардоштани ҷароҳат як соли муваффақиятҳояшро ба боди фано дод ва ӯро маҷбур сохт, то фурсати муайяне аз майдон дур бошад.

Соли 2016 Темур дигарбора ба гилеми гӯштингирӣ баргашт. Дар Ҷоми Осиё сазовори медали нуқра гардида, худи ҳамон мавсим аз вазни + 90 кг ба вазни 100 кг гузашт ва дар мавсими 2017 ба як қатор муваффақиятҳо ноил гардид. Номоёнтаринаш сазовор гардидан ба нишони тиллои 13-умин мусобиқаи байналмилалии Ҷоми Осиё, ки дар риштаи ҷудо ба хотири устоди варзиш Учқун Муродов дар шаҳри Чилчиқи Узбекистон баргузор гардид, маҳсуб меёбад.

Моҳи октябри соли 2017 бошад, Темур дар шаҳри Загреби Хорватия, ки Чемпионати ҷаҳонии ҷудоро мизбонӣ мекард, ба гирифтани медали биринҷӣ дар вазни 100 кг шарафёб гашт.

Оғози соли 2018 барои қаҳрамони мо бобарор буд, чун ӯ дар мусобиқаи байлалмилалии кураш барои дарёфти Ҷоми президенти Узбекистон, ки дар шаҳри Тошкент баргузор гардид ба гирифтани медали биринҷӣ ва 10 000 доллар шарафёб гашт. Баргашт аз Узбекистон барои Темур иқболи дигар овард, чун ӯ аввалин маротиба бо пешниҳоди мураббии мунтахаби ҷудои кишвар Муҳаммад Абдураҳмонов ба қатори ҷудокорони бузургсол пазируфта шуд, ки аввалин ҳунарнамоияш дар майдони боз ҳам ҷиддитар дар шаҳри Бокуи Озарбойҷон дар соли 2018 буд. Гарчанде ҷудокори ҷавон ҳеҷ ҷойи ифтихориро ишғол накард, аммо маҳораташ дар ин мусобиқа қобили ситоиш буд.

Пас аз бозгашт аз Озарбойҷон Темур дар мусобиқаи байналмилалии дигар, яъне Ҷоми Президенти Ҷумҳурии Тоҷикистон оид ба ҷудо, ки ҳамасола баргузор мегардад, ширкат варзида, байни сангинвазнон мақоми аввалро соҳиб гардид.

Моҳи апрели соли 2019 дар шаҳри Фуҷайраи Аморати Муттаҳидаи Араб Чемпионати Осиё оид ба ҷудо доир гардид, ки дар он Тоҷикистонро дар вазми +100 кг Темур Раҳимов намояндагӣ мекард. Шояд ин мусобиқа барои қаҳрамони мо хотирмонтарин мусобиқа дар он сол буд, чун варзишгар тавонист баъди ба даст овардани нишони нуқраи чемпионат, инчунин роҳхати Бозиҳои олимпии Токио-2020-ро ба даст орад.

Соли 2020 бемории ҳамагири коронавирус барои аксар варзишгарон мушкилӣ эҷод кард, ки дар ин радиф Темур ҳам истисно набуд. Ин беморӣ ҳатто Бозиҳои олимпиро як сол ба таъхир андохт. Ҳадафу мақсаде, ки Темур дар дил мепарварид, яъне иштирок дар олимпиада, дар соли 2021 амалӣ гардид. Омодагии қаҳрамони мо ба ин мусобиқаи бонуфуз хубу олӣ буд.

Ӯ дар Бозиҳои олимпии Токио-2020 дар даври аввал бар Энди Гранда аз Куба ғолиб омад, аммо дар даври баъдӣ аз Гурам Тушишвилии гурҷӣ шикаст хӯрд ва аз ҳаққи идомаи мубориза барои медал маҳрум гашт. Он рӯз барои Темури бо ору номус, ки шарафи як миллатро бар дӯш дошт, рӯзи душвор буд.

Пас аз Бозиҳои олимпии мазкур натиҷаи намоёни Темур дар соли 2021 ба даст овардани медали нуқра дар мусобиқаи байналмилалии ҷудо “Тоскулоҳи бузург”-и Боку маҳсуб меёбад. Темур дар ин мусобиқа дар вазни 100 кило баромад намуда, баробари нишони нуқра, инчунин 3000 евро ҷоизапулӣ низ гирифт. Ҷоизаи дигари паҳлавони тоҷик дар соли 2021 ин нишони биринҷӣ аз Гранд-слами Абу-даби ба шумор меравад.

Соли 2022 барои Темур бобарор оғоз гардид ва дар оғози мавсим, аниқтараш моҳи феврал дар мусобиқаи “Tel Aviv Grand Slam 2022”, ки дар шаҳри Телавиви Исроил баргузор шуд, медали биринҷӣ ба даст овард.

Натиҷаи намоёни дигари Темур дар соли равон соҳиби медали биринҷӣ гардиданаш дар Гранд слами Анталия мебошад. Темур, ки дар даври аввал озод буд, баъдан бар Грегори Прайор аз Иёлоти Муттаҳидаи Амрико ва Магомедумар Магомедумаров аз Имороти Муттаҳидаи Араб пирӯз шуда, ба даври чорякниҳоӣ роҳ ёфт. Вале дар чорякфинал аз Ричард Сипоч (Маҷористон) мағлуб шуд. Паҳлавони тоҷик дар даври тасаллобахш Ушанги Кокаурии озарбойҷониро мағлуб кард. Раҳимов дар мубориза барои медали биринҷӣ бошад, Ҷосеф Терҳекро аз Фаронса шикаст дод.

Соли 2022 дар мусобиқаи гӯштини миллии Ҷоми раиси шаҳри Душанбе бахшида ба Рӯзи ваҳдати миллӣ ӯ дар давраи ниҳоӣ Шарифҷон Назриевро шикаст дода, соҳиби шоҳҷоиза гардид.

Рақобатҳои охирин ва дастовардҳои бузурги Темур Раҳимов дар соли 2022 ин мусобиқаи Гранд Слами Абу Дабӣ (АМА) мебошад. Дар ин мусобиқа паҳлавони маъруфи кишвар Темур Раҳимов медали биринҷӣ ба даст овард.

ТУҲФАИ РАИСИ ШАҲРИ ДУШАНБЕ РУСТАМИ ЭМОМАЛӢ БА ТЕМУР

Темур пас аз пирӯзии бузурге, ки 6 ноябр дар мусобиқаи “Тоскулоҳи бузург”-и Боку-2022 ба даст оварду медали тиллои онро ба гардан овехт, 7 ноябр бо қарори раиси шаҳри Душанбе Рустами Эмомалӣ хонаи истиқоматии 2-ҳуҷрагӣ дар пойтахт бо тамоми шароити рӯзгор ба ӯ туҳфа гардид.

Дар мусобиқаи “Тоскулоҳи бузург”-и Боку-2022 Тумур Раҳимов ба ҷуз аз медали тилло, бо ҷоизаи молӣ ба маблағи 5000 евро мукофотонида шуд. Инчунин соҳиби 1000 имтиёзи олимпӣ гардид ва мавқеашро дар садри ҷадвали беҳтарин ҷудокорони ҷаҳон дар вазни +100 устувор намуд.

Ногуфта намонад, ки ин шашумин медали Темур Раҳимов аз мусобиқаҳои Гранд Слам оид ба ҷудо мебошад.

Бе муҳобо метавон гуфт, Темур ситораи пурҷилои олами ҷудо ва ифтихори ҳар яки мост.

Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
26 27 28 29 30 31 1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 31 1 2 3 4 5

Январ 2023 c.