Имрӯз дар шаҳри Куала-Лумпури Малайзия маросими қуръакашии марҳилаи интихобии Ҷоми Осиё-2025 байни дастаҳои наврасони то 17-сола баргузор шуд. Дар ин бора дафтари матбуотии ФФТ хабар медиҳад.

Бино ба иттилои манбаъ, аз рӯйи натиҷаи қуръакашӣ мунтахаби наврасони Тоҷикистон дар гурӯҳи “J” қарор гирифт. Рақибони дастаи мо мунтахабҳои Уммон, Сингапур ва Гуам хоҳанд буд. Бозиҳо дар гурӯҳи мазкур аз 19 то 27 октябр дар Сингапур баргузор мешаванд.

Бар асоси натиҷаи марҳилаи интихобии Ҷоми Осиё-2025 10 дастаи ғолиби гурӯҳҳо ва 5 тими беҳтарини зинаи дуюм ба қисми ниҳоӣ роҳ меёбанд.

Қисми ниҳоии Ҷоми Осиё-2025 миёни дастаҳои наврасони то 17-сола аз 3-юм то 20-уми апрели соли оянда дар Арабистони Саудӣ доир мегардад.