Бошгоҳи “Реал Мадрид” дишаб дар бозии ҷавобии даври ниманиҳоии Ҷоми Испания оид ба футбол бо рақиби сарсахти хеш “Барселона” дидор анҷом дода, бо ҳисоби 4:0 ғалаба намуд.

Ҳисобро дар дақиқаи 45-ум нимаи аввали бозӣ форварди бразилии даста, Винисиус Ҷуниор боз намуд. Дар нимаи дуввум бошад, ҳамлавари асосии бошгоҳ Карим Бензема дар дақиқаҳои 50, 58 ва 80-ум ба дарвозаи каталониҳо се гол зада, ба номаш хет-рик сабт намуд.

Бояд гуфт, ки бозии аввали дастаҳо дар даври ниманиҳоии Ҷоми Испания бо ҳисоби 1:0 ба нафъи “Барселона” анҷом ёфта буд, аммо аз рӯи ҷамъи ду бозӣ “Реал Мадрид” бо бартарии зиёди тӯбҳо ба финал баромад.

Бошгоҳи “Реал Мадрид” барои ба даст овардани Ҷоми Испания оид ба футбол дар даври ниҳоӣ бо дастаи “Осасуна”, ки қаблан дар ҷамъи ду бозӣ бар дастаи “Атлетик” пирӯз шуда буд, дар таърихи 06.05.2023 андари майдони рақобат мешавад.

Яҳё МАҲМАДНАБИЕВ, “ҶТ”