ВАРЗИШ
Ҷумъа 26 Феврал 2021 02:21
7698
Зиндагӣ бидуни орзуҳо хонаи тангу торикеро мемонад. Аммо ҳамеша роҳе вуҷуд дорад, ки моро ба ояндаи беҳтару зиндагии шоиста дилгарм мекунад, ки метавон онро роҳи умед номид.

Ҳамакнун сухан бобати нафаре меравад, ки тақдир аз ҳарду пой маҳрумаш сохта, вале қаҳрамони яке аз душвортарин риштаи варзиш-“Акробатикаи ҳавоӣ”-аш гардонидааст.

Ҷенифер Брикер сокини Амрикост. Падар ва модараш руминӣ буда, дар Амрико ба сар бурдаанд. Вақте ки модари Ҷенифер-Кэмелия духтари дуюми худ-Ҷениферро ба дунё овард, бинобар сабаби бепой таваллуд шуданаш ӯро дар беморхона партофту рафт ва зани дигаре тифли навзодро ба фарзандхонӣ гирифта, калон намуд.

Акнун оилаи нави ӯ Шарон ва Ҷералд Брикери амрикоӣ буд. Ҳарчанд ки худи Ҷенифер аз ин қазия огаҳӣ надошт, вале дар оила аз дигар фарзандон камии худро эҳсос намекард. Ҳатто меҳрубонии волидонашро нисбати дигар аъзои хонавода бештар эҳсос менамуд. То 2-солагӣ Ҷенифер на танҳо роҳ гашта наметавонист, балки бо шикам ва дастонаш ҳам худро тела додан барояш мушкил буд. Дар ниҳоят аз 3-солагӣ сар карда, Ҷенифер ҳаракат карданро тавассути дастҳо ва ронҳояш омӯхт. Аз 6-солагӣ акнун бе тарсу ҳарос ба дарахтон мебаромад ва ҳамроҳ бо се бародари калониаш аксар вақт аз трамплин ҷаҳиданро машқ мекард. Аз ин амалҳои ӯ ҳатто ҳамсояҳо дар ҳайрат буданду аз сарозер шуданаш ба замин метарсиданд. Ҷенифер мегӯяд: “Вақте дигарон аз амалҳои ман дар ҳайрат меафтоданд, ман рӯҳбаланд мегардидам, зеро вақте мардум ба ман аҳсан мехонданд, дигар аз бепой будани худ хиҷолат намекашидам”.

Чун дар 3-солагиаш ба Ҷенифер пои сунъӣ (протез) гузоштанд, барояш роҳ гаштан ниҳоят душвор гардид ва ҳеҷ гоҳ ба онҳо одат накард. Дар охир маҷбур гардид, ки протезҳоро барои абадӣ тарк кунад, зеро роҳ гаштан бе протез барояш осонтар менамуд.

Дар мактаб Ҷенифер иштирок дар бозиҳои даставиро дӯст медошт. “Ман ҳамроҳи ҳама бозӣ мекардам. Падару модарам ба ман ҳамчун шахси махсус муносибат намекарданд. Аз ин рӯ ба назарам чунин наменамуд, ки ман аз дигарон ба андозае фарқ мекунам. Медонистам, ки пой надорам, аммо ин ба ман барои иҷрои коре, ки мехостам, боре ҳам монеъ нашудааст”, - мегӯяд ӯ.

Замоне ки Ҷенифер мактабхон буд, Доминик Мосеану, яке аз варзишгарони муваффақи гимнастикаи Амрико дар Олимпиадаи соли 1996 иштирок менамуд. Чун намоиши гимнастикаи Доминикро, ки медали тиллои олимпиадаро ба даст овард, тамошо намуд, шавқи гимнаст шудан дар дилаш шуълаи худро равшан сохт.
Пас аз ин Ҷенифер қарор кард, ки новобаста аз он ки чӣ мушкил дорад, гимнаст мешавад. Волидонаш бо дидани шавқу рағбати зиёди Ҷенифер ӯро ба мактаби махсуси варзишии гимнастикӣ супориданд.
Вай дар мактаби варзишӣ ба намуди ҷаҳиши акробатикӣ шурӯъ кард. Ҷенифер намехост, ки мураббиёнаш дар маъюбии ӯ сабукӣ кунанд. “Вақте, ки рақобат мекардам, медонистам, ки маро ҳақиқӣ доварӣ мекунанд”, - мегӯяд вай. Аввалин боре, ки Ҷенифер ба майдон баромад, мардум сахт тааҷҷуб карда, чунин мегуфтанд: “Ваҳ, вай пой надорад, магар вай комёб мешавад?”. Вале чунин суханон барояш ҳеҷ таъсиргузор набуд, баръакс ӯро бештар ба муваффақият мебурд: “Вақте ман ҳунарнамоӣ мекардам, дастгирии бениҳоят бузург буд. Мухлисон маро аҳсант мехонданду фарёд мезаданд ва қарсакҳои бошиддаташон бештар рӯҳбаландам мекард”.

Ҷенифер дар 10-солагӣ дар Олимпиадаи наврасон, ки аз ҷониби Иттифоқи варзишгарони ҳаваскори Амрико баргузор шуд, ширкат варзид. Ин бозиҳо бузургтарин сабқати варзишгарони наврас дар Иёлоти Муттаҳида ба ҳисоб мерафтанд. Дар ниҳоят Ҷенифер дар 11-солагии худ ба орзуяш расид ва тавонист, ки унвони қаҳрамони Амрикоро дар шаҳри Илинойс аз рӯйи ҷаҳиши акробатикӣ сазовор гардад.

Пас аз пирӯзӣ Ҷенифер тамринашро идома додан гирифт ва танҳо дар пайравӣ аз Доминик амал мекард. Пас аз он ҳама дӯстдориву тақлидҳои Ҷенифер ба Доминик модархондаш Шарон ба ӯ иқрор шуд, ки ӯ духтархондаш аст ва саргузашташро барояш ҳикоят намуд. Ҳарчанд ки шунидани он воқеаи ғамангезу боварнокарданӣ барояш осон набуд, вале бо шунидани насаби аввалаи худи ӯ, ки Ҷенифер Мосеану аст ва Доминик Мосеану хоҳаркалони ӯ буд, ашк аз чашмонаш рехт. Ҷенифер пас аз шунидани қиссаи ғамангезаш дигар чӣ кор карданашро намедонист, вале аз хоҳаркалонаш будани Доминик то андозае хушҳол буд.
Қаҳрамони бозиҳои олимпӣ-Доминик низ аз чунин амали волидонаш ва аз доштани чунин хоҳаре, ки волидонаш ба дигаре гузоштаву рафтаанд, бехабар буд. Пас аз фаҳмидани ҳақиқат, Ҷенифер мехост бо Доминик тамос гирад, аммо ба пиндори ӯ ин бояд дуруст анҷом дода мешуд. “Ман наметавонистам танҳо ба ӯ занг зада “Салом, ман хоҳари шумоям”,-бигӯям, намехостам, ки вай маро девона пиндорад”.

Ҷенифер нафареро пайдо намуд, ки ҳамчун муфаттиши хусусӣ кор мекард ва аз ӯ хоҳиш кард, ки волидони воқеии ӯро пайдо кунад ва худ бо онҳо тамос гирад. Бо чунин сарсонию пурсуҷӯи волидони воқеӣ, аз байн як сол гузашт ва дар ниҳоят тасмим гирифт, ки аввал ба Доминик мактуб нависад. Ҷенифер ба хоҳари худ мактуб навишт, ки дар он ӯ дар бораи худ ва чӣ гуна пайравӣ ба Доминик карданашро, ки маҳз ҳунари ӯ Ҷениферро ба дунёи гимнастика ворид намуд, навишт. Ҳамчунин дар бораи хоҳаркалон будани Доминик бо худи Ҷенифер чунин ёддоште кард: “То ба ҳол боварам ба ин чиз намеояд, шумо тамоми умр идеали ман будед ва акнун хоҳари ман ҳастед!”.

Ба нома нусхаҳои ҳамаи ҳуҷҷатҳое, ки ӯ дошт ва аксҳои ӯ замима карда шуданд, аммо расмҳои худаш танҳо аз болои камар буданд. “Ман тасмим гирифтам, ба ӯ нагӯям, ки пой надорам. Намехостам, вай фаҳмад, ки хоҳаре дорад, ки ҳеҷ гоҳ нашунидааст”-мегӯяд Ҷенифер.

Ҳангоме ки мактуб ба дасти Доминик расид, ӯ аллакай 26-сола буд ва барои таваллуди фарзанди нахустинаш дар беморхона омодагӣ медид. Пас аз таваллуди фарзандаш, Доминик барои гирифтани бастае, ки дар бораи он огоҳинома гирифта буд, ба почта рафт. Вай ҳангоми ба мошин баргаштан лифофаи вазнинро кушод. Аввалин чизе, ки вай дид, баъзе ҳуҷҷатҳои додгоҳ буданд, ки бо имзои волидонаш анҷом ёфтааст. Ин ӯро ба ҳайрат овард. Баъд ӯ аксҳои духтареро дид, ки ба хоҳари хурдиаш Кристина монанд аст. “Монандӣ бениҳоят зиёд буд”, -мегӯяд Доминик. Ниҳоят вай номаро кушод: “Номи волидайни биологии ман Мосеану аст”.
- “Ин бузургтарин такон дар ҳаёти ман буд, ман онро ҳеҷ гоҳ фаромӯш намекунам”, -мегӯяд Доминик. Баъди хонда ба итмом расидани мактуб Доминикро эҳсоси ногуворе фаро гирифт ва барои боварӣ ҳосил кардан ба ҳама он чизе, ки дар мактуб навишта шудааст, аз мошин набаромада, ба модари худ, ки дар минтақаи дигар зиндагӣ мекард, занг зад ва бо саволе ӯро такон дод: “Оё шумо духтари хурдсолеро барои фарзандхонӣ дар соли 1987 ба зани дигар супоридаед?”. “Ман саволро мустақиман пурсидам ва эҳтимолан ин бедоршавии шадидтарин дар ҳаёти модарам буд”,-мегӯяд Доминик.

Аз чунин саволи ғайричашмдошт, ки аз ин ҳодиса 20 сол гузашта буд, модараш ба ҷуз ҳақиқат дигаре чизе гуфта натавонист ва чун гиря гулӯгираш карда буд, ҳақиқати ҳолро дар як калима баён кард: “Бале”.
Чанд ҳафтаи оянда пур аз ғавғо гузашт. Доминик ба Ҷенифер навишт, ки барои фаҳмидани маълумоти гирифташуда вақт лозим аст ва ӯ бояд пайи ин масъала ҷиддан кор барад.

Пас аз фаҳмидани ҳақиқат Доминик бо хоҳари худ Ҷенифер тамос гирифт ва аз ҳаёти якдигар пурсон гардиданд. Дар ниҳоят Ҷенифер қарор кард, ки ба хоҳаркалонаш чизи асосие, ки сабабгори чунин қисматаш гардидааст, бигӯяд: -“Воқеан, ту медонӣ, ки ман пой надорам?” аз шунидани чунин сухан Доминик ба ҳайрат афтод ва тааҷҷубашро бештар гимнаст будани ӯ ҷалб кард.

“Вай ба ман гуфт, ки маҳз ба шарофати ман ӯ гимнастикаро пеша кард ва ҳеҷ гумон надоштам, ки вай ин қадар варзишро бе пойҳо анҷом медиҳад”, - мегӯяд Доминик.

Акнун солҳои интизориву қиссаи бистсолае, ки ба кунҷи хомӯшӣ рафта буд, ба поён расид. Соли 2007 буд, хоҳарон тасмим гирифтанд, ки ҳарсеашон-Доминик, Ҷенифер ва Кристина бори аввал дар шаҳри Огайо, ки Доминик онҷо зиндагонӣ менамуд, вохӯранд.

“Аз як сӯ, ин мисли хоб буд, аммо аз тарафи дигар ҳама чиз хеле табиӣ буд. Вақте ки бо хоҳари хурдиам вохӯрдам, ин ба монанди оина нигоҳ кардан буд”, - меафзояд Ҷенифер.

Хоҳарон дар ҳайрат монданд, ки чӣ қадар умумияте доранд. Худи ҳамон хандаҳо, имову ишораҳои маъмулӣ. Аммо вақте ки онҳо дар бораи гузашта гап мезаданд, маълум шуд, ки ҳикояҳои онҳо ба куллӣ фарқ доранд.
Падари хоҳарон, ки чанд муддат дар беморхона бистарӣ буд, пеш аз мулоқот бо Ҷенифер вафот кард, аммо моҳи январи соли 2010, дар 22-солагӣ Ҷенифер бори аввал бо модари биологии худ Кэмелия шинос шуд.
Ҷенифер, ки 20 сол аз оғӯши модари аслиаш дур буд, ӯро ба оғӯш кашид. Баъдан ҳамроҳи хоҳарон намоишномаҳои Ҷениферро, ки айёми кӯдакию наврасӣ ва ҳунарнамоиҳояшро фиттаи махсус намуда буд, тамошо намуданд.

Бо вуҷуди ҳама рӯзҳои гузашта Ҷенифер аз модараш хашмгин набуд ва сабабгори ҳамаи инро қисмат медонист. Ӯ бо хушнудӣ ва шукргузорӣ аз волидони амрикоияш гуфт, ки сабабгори ҳама муваффақиятҳояш ин волидонаш ҳастанд, ки ӯро ба фарзандхонӣ гирифтаанд.

Ин буд бозгашт ва дидоре, ки ҳеҷ интизорашро надоштанд ва шояд ба гӯшаи фаромӯшӣ низ рафта буд. Акнун пас аз висоли ҳамдигар оила ҳар кадом дар гӯшаҳои мухталиф зиндагонӣ ихтиёр намудаанд ва тез-тез бо ҳам вохӯрӣ менамоянд.

Имрӯз Ҷенифер Брикерро ҳамчун акробат ва ситорае дар фазои варзиш мешиносанд. Аввалин бурди ӯ дар олимпиадаи бачагона миёни мактабҳои Амрико дар шаҳри Илинойс буд. Ҳамчунин ғолиби озмуни Бозиҳои олимпии AAU “Power Acrobatic dance” ва ҷоизадори Ассотсиатсияи акробатии Амрико мебошад.


Таҳияи
Қиёмиддин МАҲМАДҶОНОВ
“ҶТ”

Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28

Феврал 2021 c.