Узви дастаи мунтахаби Тоҷикистон, Виктор Рассадин, дар марҳилаи охирини мусобиқаи интихобӣ дар риштаи гӯштии озод, ки 11-уми май дар Туркия баргузор шуд, соҳиби роҳхат ба Бозиҳои олимпии Париж - 2024 гардид, ки ҳайати иштирокчиёни олимпиро аз Тоҷикистон ба 5 нафар расонид.

Бояд гуфт, ки Виктор Рассадини аз Ёқутистони Русия мебошад ва ба дастаи мунтахаби гӯштии озоди Тоҷикистон даъват шуда, шаҳрвандии Тоҷикистонро пазируфтааст. Ӯ дар мусобиқаи интихобии олимпӣ дар шаҳри Истанбули Туркия дар вазни то 74 кило дар даври аввал ба Нурхоҷа Кайпанови қазоқ (4:1), баъдан ба Зелимхон Ҳоҷиев (6:5) аз Фаронса, сипас ба Вадим Тсуркан (2:0) аз Украина ғолиб шуда, ба даври ниманиҳоӣ роҳ ёфт.

Рассадин дар нимфинал Чермен Валиевро аз Албания бо ҳисоби 3:2 шикаст дода, ба финал баромад ва соҳиби роҳхати олимпӣ гардид. Вай Тоҷикистонро дар риштаи гӯштии озод дар Олимпиадаи Париж-2024 муаррифӣ хоҳад кард. Айни замон ин варзишгар 30-сол дошта дар ҳолати хуби варзишӣ қарор дорад ва умед аст, ки аз Париж-2024 дасти холӣ бар намегардад.

Яҳё МАҲМАДНАБИЕВ, “ҶТ”