21-уми март тими миллии Тоҷикистон дар доираи даври дуюми марҳилаи интихобии Ҷоми ҷаҳон-2026 дар гурӯҳи “G” бозии сеюми худро муқобили тими миллии Арабистони Саудӣ анҷом медиҳад. Дар ин бора Федератсияи футболи Тоҷикистон хабар медиҳад.

Бино ба иттилои ФФТ ин вохӯрӣ дар варзишгоҳи Донишгоҳи шоҳи Сауд баргузор шуда, соати 23:59 ба вақти Душанбе оғоз мешавад.

Рақобати ҷавобии тимҳои миллии Тоҷикистон ва Арабистони Саудӣ дар даври чоруми марҳилаи интихобии Ҷоми ҷаҳон-2026 дар Варзишгоҳи марказии шаҳри Душанбе доир мегардад. Ин дидор 26 март соати 20:00 о ғоз мешавад.

Бояд гуфт, ки тими миллии футболи Тоҷикистон дар соли 2024 пас аз чанд рақобати арзанда аз ҷониби Федератсияи байналмилалии футбол (ФИФА) ба 100-гонаи беҳтарин тамҳои мунтахаб ворид гардид.

Чандрӯз қабл ФИФА дар сомонаи расмии худ матлаберо таҳти унвони “Ҳадафҳои бузург Тоҷикистонро ба 100-гонаи беҳтаринҳои раддабандии ҷаҳонӣ мебарорад” нашр кард, ки ба баромади бомуваффақи тими миллии Тоҷикистон дар Ҷоми Осиё-2023 бахшида шудааст.

Ёдовар бояд шуд, ки дар Ҷоми Осиё-2023 дар Доҳа мунтахаби Тоҷикистон панҷ бозӣ анҷом дод. Дастаи мо дар марҳилаи гурӯҳии мусобиқот бо Чин мусовӣ (0:0) намуда, аз Қатар шикаст хӯрд (0:1) ва бар Лубнон (2:1) зафар ёфт. Дар даври 1/8 ниҳоӣ мунтахаби Тоҷикистон бар тими Амороти Муттаҳидаи Араб (1:1, 5:3 аз рӯйи пеналтӣ) ғолиб омада, дар даври чорякниҳоӣ аз мунтахаби Урдун (0:1) ноком шуд.

Яҳё МАҲМАДНАБИЕВ, “ҶТ”