Ҷумҳурии Тоҷикистон шурӯъ аз солҳои аввали Истиқлолияти давлатӣ дар рушди соҳаи варзиш тадбирҳои мақсаднок анҷом дода, баҳри наврасону ҷавонон ва дӯстдорони варзиш иншоотҳои зиёди варзишӣ бунёд гардидааст. Аз ҷумла, Муассисаи давлатии “Мактаби ҷумҳуриявии махсуси варзишӣ оид ба намудҳои варзиши обӣ” бо Қарори Ҳукумати Ҷумҳурии Тоҷикистон аз 2 июли соли 2009 таҳти рақами 396 таъсис ёфта, аз моҳи январи соли 2010 мавриди истифода қарор гирифт. Дар асоси дастуру супоришҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз тарафи Дирексияи сохтмонии иншоотҳои Ҳукуматии Дастгоҳи иҷроияи Президенти Ҷумҳурии Тоҷикистон, ки фармоишгари азнавсозии “Ҳавзи шиноварӣ”-ро ба ӯҳда гирифтааст, корҳои сохтмонию азнавсозӣ аз тарафи пудратчӣ - Корхонаи фаръии таъмиру сохтмонии худмаблағгузори назди ҶСК “Тоҷиктрансгаз” сохта ба истифода дода шуд.

Бо азнавсозии Ҳавзи шиноварӣ, ки ҳамзамон, дар муассиса оид ба намудҳои варзиш 103 варзишгар дар 14 гурӯҳ, дар 3 зинаи машқӣ, аз ҷумла дар 9 гурӯҳи машқӣ-варзишӣ бо теъдоди 79 машқварз, дар 3 гурӯҳи мукаммалгардонии малакаву маҳорат бо теъдоди 13 машқварз ва дар 2 гурӯҳи маҳорати олии варзишӣ бо теъдоди 11 нафар варзишгарон аз рӯи 3 намуди варзиши олимпӣ (шиноварӣ, шухпаймоӣ ва қаиқронӣ) ба тамрину машқварзӣ фаро гирифта шудаанд. Муассиса дар панҷсолаи охири фаъолияти кориаш аз ҳисоби умумии машқварзон зиёда аз 109 нафар бо дараҷаи варзишии НУВ, 100 нафар унвони варзишии УВҶТ ва 4 нафар УВДБ омода намудааст.

Қобили зикр аст, ки имрӯз дар пойтахти кишвар - шаҳри Душанбе қариб 11 ҳазор иншооти соҳаи варзиш, аз ҷумла 122 варзишгоҳ, беш аз 7200 майдончаи варзишӣ, 1803 толори варзишӣ, 93 ҳавзи шиноварӣ, 37 маҷмааи варзишӣ ва 121 иншооти махсуси варзишӣ (тир, боулинг, фитнес) фаъолият менамоянд, ки ҳамаи онҳо барои солимгардонии миллат, рушди варзиш барои обутоби ҷисмонии наврасону ҷавонон нақши ибратбахш мебозад.

Боиси ифтихор аст, ки маҳз бо таваҷҷуҳ ва дастгириҳои доимии Ҳукумати мамлакат рушди оммавияти варзиш дар тамоми сатҳи кишвар имконпазир гардид.

Бо мақсади таҳкими тарзи ҳаёти солим миёни наврасону ҷавонон дар доираи таҷлили иду ҷашнҳои миллӣ ва санаҳои таърихӣ ҳамаҷониба дар якҷоягӣ бо Кумитаи кор бо ҷавонон ва варзиши назди Ҳукумати Тоҷикистон ва намояндагони сохторҳои маҳаллӣ чорабиниҳои оммавӣ-варзишӣ дар сатҳи баланди касбӣ ташкил ва баргузор карда мешавад.

Ҳамчунин, бо мақсади ҷалби наврасону ҷавонон ба варзиш ва омода кардани варзишгарони касбӣ дар кишвар 128 мактаби варзишӣ фаъолият менамояд.

Ба истифода дода шудани боз як маҷмааи бузурги варзишӣ дар яке аз мавзеъҳои хушманзараи пойтахти кишвари азизамон аз ҳисоби маблағҳои буҷети шаҳри Душанбе дар ҳаҷми 945 милл ион сомонӣ дар майдони 10 гектар худ далели рушди соҳаи варзиш дар кишвар мебошад. Қасри теннис ва маҷмааи варзишии обӣ бо 5285 ҷойи нишаст, 27 лифт бо таввақуфгоҳи зеризаминӣ барои 280 воситаи нақлиёт ва дар шафати он ҳашт майдони теннис, ки ҳар кадомашон дорои 1000 ҷойи нишаст мебошад, сохта ба истифода дода шуд, ки ин ҷалби на фақат варзишгарон, балки ҷавононро ба соҳаи варзиш ва тарзи ҳаёти солим роҳандозӣ менамояд.

Қайд кардан ба маврид аст, ки бо ифтитоҳи ҳавзҳои нави шиноварӣ имконият ва ҳавасмандии варзишгарони шиновар зиёд мегардад. Ин иншоотҳои варзишӣ моро водор менамояд, ки натиҷаҳои баланди варзиши байналмилалиро ба даст оварем ва меҳри баланди меҳнатпарастии Пешвои миллатро дар қалбҳои худ доимо нигоҳ дорем.

Ҳасан ШАРИПОВ,
директори муассисаи
давлатии “Мактаби ҷумҳуриявии махсуси варзишӣ
оид ба намудҳои варзиши обӣ”-и КҶВ