Арзиши дарвозабони дастаи “Истиқлол” ва мунтахаби Тоҷикистон Рустам Ятимов ба 1 миллиону 200 ҳазор евро боло рафт.

Дар ин бораи трансфермаркт – портале, ки арзиши бозингаронро дар саросари дунё муайян мекунад, хабар дод.

Ҳамин тариқ, трансфермаркт ӯро гаронарзиштарин дарвозабони Осиёи Марказӣ эълон кард.

Илова бар ин, Ятимов ба даҳгонаи гаронарзиштарин футболбозони Осиёи Марказӣ шомил шуд.

Арзиши Ятимов замоне боло рафт, ки ӯ дар Ҷоми Осиё-2024 арзанда баромад намуда, сейфҳои олиро иҷро намуд.

Баробари Рустам Ятимов, трансфермаркт арзиши Зоир Ҷӯрабоевро 10 ҳазор евро боло бурд, ки ҳоло 700 ҳазор меистад.

Ба арзиши Ваҳдат Ханонов ва Манучеҳр Сафаров низ ҳар кадом 100 ҳазор (ҳоло нархи Ваҳдат 450 ҳазор, Манучеҳр 350 ҳазор евро) илова шуд.

Алишер Шукуров 150 ҳазор (ҳоло 400 ҳазор), Аҳтам Назаров 125 ҳазор (ҳоло - 250 ҳазор) илова кардааст.

Ёдовар мешавем, ки Тими миллии Тоҷикистон дар Қатар дар даври 1/8 ниҳоии Ҷоми Осиё бар тими Амороти Муттаҳидаи Араб дар зарбаҳои пеналтӣ (дар вақти асосӣ 1:1, дар пеналтӣ 5:3) пирӯз шуда, ба марҳилаи навбатии мусобиқот роҳ ёфт, ки маҳз ин дидор арзиши Ятимовро ба маротиб боло бурд.

Яҳё МАҲМАДНАБИЕВ, “ҶТ”