Варзиши тоҷик солҳои охир ба дастовардҳои назаррас ноил гашта истодааст. Варзишгарони мо дар ин солҳо борҳо кишварро дар арсаи ҷаҳонӣ шоиста муаррифӣ намуданд. Ин пешравиҳо дар самти футбол низ истисно нест. Футболбозони мо собит намуда истодаанд, ки қодиранд бо дилхоҳ тими пурқудрат сабқат намуда, дар баробари онҳо баҳри пирӯзӣ талош намоянд. Ин ҳама талошу заҳматҳои варзишгарон танҳо ва танҳо баҳри оламшумул кардани футболи тоҷик асту бас.

Дар матлаби мазкур дар бораи нафаре маълумот хоҳем дод, ки бо ҳангомаофарии худ, ҳатто беҳтаринҳои футболро ба эҳсосу ваҷд овард, то барояш рост истода каф бикӯбанд. Шояд хонанда пай бурд, ки сухан дар бораи кӣ меравад. Бале ин нафар ҷуз дарвозабони бомаҳорат Рустам Ятимов касе нест. Рус-таме, ки аз ҳайати бошгоҳи “Истиқлол” ба майдон омада, яке аз нобиғаҳои футбол Криштиан Роналдуро бо ҳунари хеш ба ҳайрат овард.

Шоми 2-юми октябри соли ҷорӣ дар даври дуюми марҳилаи гурӯҳии Лигаи чемпионҳои Осиё 2023-2024 миёни тими “Истиқлол”-и Душанбе ва “Ал-Наср”-и Ар- Риёз (Арабистони Саудӣ) дар Арабистони Саудӣ бозӣ баргузор гашт. Бозии мазкур ҳарчанд ба фоидаи дастаи арабӣ анҷом ёфт, аммо баъзе қаҳрамониҳое аз ҷониби дастаи “Истиқлол” анҷом дода шуд, ки мухлисони футболро ҳайратзада кард. Яке аз ин қаҳрамониҳо, ин аввалин шуда, ба дарвозаи чунин як тими пурқудрати қора, ва он ҳам дар майдони худи он задани гол аст, ки чунин ҳунарнамоӣ ба ҳар даста муяссар намешавад.

Дар баробари ин, ҳунар-намоии Рустам Ятимов дарвозабони бошгоҳи “Истиқлол” дар ин бозӣ боиси таҳсину офаринҳо буд. Рустам дар сабқати мазкур тавонист, бо сейвҳо (баргардонидани тӯбҳо)-и олии худ Роналдо ва дигар ҳамдастаҳояшро дар ҳайрат гузорад. Ин ҳолат то ҷое ба Роналдо таъсир кард, ки пас аз зарбаи сахти ҳамдастааш, ки Рустам онро ба осонӣ баргардонид, Рустамро ба оғӯш гирифта, барои ҳунарнамоии олиаш каф кӯфт.

ЗИНДАГИНОМАИ РУСТАМ

Рустам мутаваллиди соли 1998 аст. Ӯ дар шаҳри Нижний Навгороди Русия таваллуд шуда, овони наврасиаш дар ин шаҳр гузаштааст. Рустам ба футбол аз 8 - солагӣ майл пайдо кард. Дар ин роҳ ӯро мураббии футбол бештар шавқманд мекард. Худи ӯ низ инро дар яке аз суҳбатҳояш қайд мекунад.

“Ба монанди дигар наврасон ман низ шавқи зиёд ба футбол доштам. Вақте дар синфи дуюм мехондам, мураббии футбол ба синфи мо омад ва гуфт: “Кӣ мехоҳад ба футбол машғул шавад?”. Ман даст бардоштам. Аз он замон ба тамрини футбол оғоз кардам ва то ба имрӯз дар ин самт фаъолият дорам”.

Ҳамин тавр, Рустам ба олами футбол ворид шуд. Дунёе, ки дорои ситораҳои дурахшон дар самти худ аст. Он ҷаҳоне, ки ба монанди Пелеву Марадона нобиғаҳо дар таърих номнавис кард. Волидони Рустам аз варзиш дур буданд. Ӯ дар оила танҳо нафаре ба шумор мерафт, ки ба варзиш машғул аст. Ба ин нигоҳ накарда, дар роҳи пешгирифта талош мекард, то ба дастовардҳои назаррас ноил гардад.

Аввалин дастае, ки Рустам дар он ба ҳайси дарвозабон бозӣ кард, ин дастаи “Нижний Новгород” буд. Рустам ба ҳайати ин даста аз 26 феврали соли 2016 шомил шуд. Ҳарчанд шартномаи ӯ бо даста ба муҳлати дувуним сол баста шуда буд, аммо Рус-там танҳо як сол дар ин даста ҳунарнамоӣ кард. Дар ҳайати тими “Нижний Новгород” ба ғайр аз Рустам футболбози дигаре аз Тоҷикистон Искандар Ҷалилов низ ҳунарнамоӣ мекард. Пас аз як соли фаъолият дар дастаи мазкур роҳбарияти даста эълон карданд, ки бинобар сабабҳои молиявӣ онҳо тасмим доранд, фаъолияти дастаро қатъ кунанд. Рустам низ дар қатори дигар футболбозон бе даста монд. Пас аз он, ӯ ба дастаи “Динамо”-и Русия рафт. Аммо дар ин даста мавқеъ пайдо карда натавонист ва бинобар сабаби паст будани сатҳи ҳам молиявӣ ва ҳам шароити бади даста ӯ маҷбур шуд, то бошгоҳро тарк кунад. Пас аз он, бо дархости Искандар Ҷалилов Рустам ба дастаи “Истиқлол” омад.

“Пас аз баромадан аз дастаи “Динамо”, моҳи октябри соли 2016 Искандар Ҷалилов ба ман занг зад. Гуфт агар хоҳиш дошта бошам, ба дастаи “Истиқлол” пайвандам. Ман ба дастаи мазкур омадам. Дар ин ҷо ман ду бозии санҷишӣ гузаронидам. Дар ин вақт мураббигии дастаро Муҳсин Муҳаммадиев ба ӯҳда дошт. Пас аз ду бозӣ ҳунарнамоии ман ба сармураббӣ писанд омад ва ӯ маро ба ҳайати тими “Истиқлол” пазируфт. Ҳамин тавр, ман фаъолиятамро дар дастаи “Истиқлол” идома додам”, - мегӯяд Рустам.

Пас аз як соли бозӣ дар “Истиқлол” Рустам дигарбора ба Русия рафт, то дар лигаи дуюми футболи ин кишвар ҳунарнамоӣ намояд. Аммо ин мақсадаш амалӣ нагашт. Дар ин вақт замони трансферҳо ба анҷом расида буд ва ӯ маҷбур шуд, то як сол танҳо ба тамрин машғул шавад. Бо гузашти як сол дигарбора ба дастаи “Истиқлол” баргашт. Бозгашти Рустам ба дас-таи “Истиқлол” ба 23-юми июли соли 2018 рост омад. Ин навбат Рус-там то охири соли 2020 шартнома ба имзо расонид. Пас аз ҷамъбасти шартнома, шартномаи дигар баста шуд ва айни замон Рустам дар ҳайати асосии тими “Истиқлол” фаъолият дорад.

Аз рӯи сомонаи олмонии “Transfermarkt” имсол Рустам ба феҳристи гаронарзиштарин футболбози тими миллии Тоҷикистон гардид. Арзиши дарвозабони тими миллии кишвар ба ҳисоботи 3-юми августи соли ҷорӣ ба 750 000 евро баробар мебошад. Айни замон Рустам дар ҳайати тими “Истиқлол” яке аз варзишгарони калидӣ ба ҳисоб меравад. Дар баробари ин, ӯ ҳамчунин вазифаи дарвозабонии тими мунтахаби Тоҷикистонро низ ба ӯҳда дорад, ки ин аз ҳунари волои ин варзишгар гувоҳӣ медиҳад.

Ҳошим РАҲМАТУЛЛОЕВ, “ҶТ”