Бештар аз ду ҳафтаи охир аст, ки дар Маҷмааи варзишии Муассисаи давлатии мактаби ҷумҳуриявии маҳорати олии варзишӣ оид ба намудҳои гӯштин, аз тарафи Кумитаи кор бо ҷавонон ва варзиши назди Ҳукумати Ҷумҳурии Тоҷикистон барои устодони намуди варзиши гӯштини дзюдои минтақаҳои гуногуни кишвар семинари таълимии амалӣ гузаронида шуда истодааст.

Дар семинар ҳудуди 20 нафар устодони ин намуди варзиш ба таълим фаро гирифта шуда, ба онҳо устодони ботаҷрибаи варзиши кишвар, аз ҷумла паҳлавони маъруф Рауф Ҳукуматов усулҳои нав ва нозукиҳои навъи гӯштини дзюдоро меомӯзонанд.

Иззат Худоёров, мураббии Мактаби мазкур изҳор дошт, ки аз ташкил кардани семинари таълимии амалӣ барои мураббиёни варзиши дзюдо хеле хушҳоланд.

-Ин семинар ба мо мураббиён имкон фароҳам меорад, ки аз нозукиҳои нав ва усулҳои навтарину беҳтарини варзишии дзюдо бохабар шавему омӯзем ва ба шогирдони худ онҳоро таълим диҳем. Ба ин васила мо талош мекунем, ки варзиши дзюдои кишвари азизамон, Тоҷикистонро дар сатҳи байналмилалӣ муаррифӣ созем. Барои расидан ба ин ҳадафи бузург ҳам таълимгирандагон ва ҳам мо мураббиёну устодонро омӯзишу талоши бештар лозим аст,-илова кард И.Худоёров.