ВАРЗИШ
Панҷшанбе 21 Ноябр 2019 11:36
6400
Шаҳриёр Даминов дар даврони соҳибистиқлолии кишвар ягона варзишгарест, ки дар риштаи қайиқронӣ дастовардҳои назаррасро соҳиб шудааст. Ӯ соли 2015 дар шаҳри Палем-банги Индонезия дар намуди каноэи якнафара байни ҷавонон ба масофаи 200 метр мақоми аввалро ишғол карда, қаҳрамони Осиё шуд. Соли 2017 бошад дар шаҳри Шанхайи Ҷумҳурии мардумии Чин медали нуқраи чемпионати Осиёро ба даст овардааст. 

Рӯзномаи “Ҷавонони Тоҷикистон” зери рубрикаи дар меҳмонии “Ҷавонони Тоҷикистон” тасмим гирифт, ин навбат доир ба фаъолияти варзишӣ, роҳи интихобкарда ва нозукиҳои қайиқронӣ аз ин варзишгари маъруф барои саволҳои мухлисонаш ҷавоб пурсад.

Хушдили Давлатмурод: Лаҳзаҳое буданд, ки худро дилшикаста ҳис мекардед?
- Кушиш мекунам, ки ҳеҷ гоҳ руҳафтода нагардам. Агар шахс иродаи мустаҳкам дошта бошад, чунин ҳолатҳо хеле кам рух медиҳанд. Лаҳзаҳое ҳастанд  ки ба нокомӣ рӯ ба рӯ мешавӣ ё ба мусобиқае, ки сахт омодагӣ мебинӣ, вале туро сафарбар намекунанд, вале чунин ҳолатҳо хеле каманд. Аммо ба ноумедӣ роҳ набояд дод. Зеро бо мурури замон ба ҳама коре, ки барояш заҳмат кашидаӣ муваффақ хоҳӣ шуд.

Беҳрӯз Намозов: Нақши варзишгарро дар муаррифии кишвар чӣ гуна арзёбӣ мекунед?
- Дар партави сиёсати варзишпарваронаи Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ки соҳаи варзишро дар меҳвари сиёсати худ қарор дода,  мо варзишгаронро бо тамоми шароитҳои муосир таъмин намудааст, сипосгузорем. Варзишгарон, ки худ муаррифгарони давлату миллат дар сатҳи байналмиллалӣ ба шумор мераванд, ҷавобан ба ин сиёсат дар муаррифии кишвар нақши муҳим мебозанд. Ба ҳамагон маълум аст, ки ба воситаи варзишгарон борҳо Суруди миллӣ садо додаву Парчами давлатӣ дар сатҳи ҷаҳонӣ парафшон шудааст. Мо варзишгарон бояд ба боварии миллати тоҷик сазовор гардида, Парчами Тоҷикистонро ҳамеша парафшон намоем.

Ҷовидон Муродов:  Қайиқронӣ аз дидгоҳи шумо чист? Шавқу рағбат, шуҳрат, мақсад, касб ё...?
- Агар дар шахс нисбати коре ё касбе  меҳр пайдо шавад, пас аз муддате он ба мақсад табдил меёбад. Банда аз овони хурдӣ ба ин риштаи варзиш шавқ  доштам. Дар пеши худ мақсад гузоштам, ки бояд ин риштаи варзишро интихоб карда, дар оянда ба натиҷаҳои назаррас ноил гардам. Баъд ба тамрин оғоз намудам ва бо дастгириҳои Ҳукумати кишвар ба мусобиқаҳо сафарбар гардидам. Аз ҳамон лаҳза эҳсос кардам, ки  қайиқронӣ барои ман ҳавас, шавқ, рағбат, мақсад, ҳадаф, касб ва хуллас ҳама чиз аст. 

Шаҳноза Дӯстова: Аз уҳдаи пухтани кадом хӯрокҳо ба хубӣ баромада метавонед?
- Он қадар ба пухтани хӯрок балад нестам. Ба ҳар ҳол сихкабоб ва тухмро то ҳадди имкон омода карда метавонам.

Фирӯз Бадриддинов: Қайиқронӣ дар Тоҷикистон дар кадом сатҳ қарор дорад?
- Имрӯзҳо бо дастгирии Пешвои муаззами миллат ба мо варзишгарон тавваҷуҳи хос зоҳир гардида, тамоми шароитҳои муосир фароҳам оварда шудаанд. Тамоми соҳаҳои варзиш дар даврони истиқлолият рӯ ба инкишоф аст. Аз ҷумла риштаи варзишӣ қайиқронӣ низ нисбати солҳои пешин дар сатҳи хуб қарор дорад ва варзишгарон оҳиста - оҳиста ба шароитҳои муосиру созгор таъмин гардида истодаанд.

Нарзуллоев Ҳусейнҷон: То ба зинаи қаҳрамонӣ баромадан чӣ мушкилиҳоро паси сар кардед?
- Ҳар як нафар роҳе ё касберо, ки  интихоб мекунад пеш аз ҳама бояд дар пеш  мақсад дошта бошад. Бе мақсад ҳеҷ кас ба натиҷае ноил гашта наметавонад. Агар мақсад ва шавқ нисбати пешаи интихоб кардаат бошад, тамоми қуллаҳои баландарин насибат мегардад. Мақсади дар пеш гузошта шуда ва шавқу завқ нисбати ин риштаи варзиш манро то ба зинаи қаҳрамонӣ расонд. То ба зинаҳои қаҳрамонӣ расидан ман бисёр сабр намудам ва машқу тамринҳои зиёде кардаам. 

Фарида Холмуродзода: Ба назари шумо барои тайёр намудани варзишгарони касбӣ чӣ корҳоро бояд анҷом дод?
- Пеш аз ҳама ба варзишгар шароити хуби тамрин фароҳам овардан лозим. Дар Тоҷикистон мураббиёни касбӣ фаъолият доранд, аммо варзишгарон таҷрибаи кам доранд. Бисёртар ба шароитҳои муосир таъмин шуда ба мусобиқаҳо сафарбар карда шаванд.

Асрор Тулегов: Дар даврони соҳибистиқлолӣ дар соҳаи қайиқронӣ ягона нафаре ҳастед, ки унвони қаҳрамони Осиё ва дигар ҷоизаҳои байналмилалиро ба даст овардаед, муваффақиятҳои хешро дар чӣ мебинед?
- Рости вақте якумин ҷоизаи ин риштаи варзишро ба даст овардам, мақсад гузоштам, ки то қуллаҳои баландтарини он талош варзам. Ва дар комёбиву муваффақияттҳоям саҳми мураббиёнам бисёр калон аст. 

Исломиддини Файзиддин: Тамринҳои худро дар куҷо мегузаронед? Дар кишвар барои тамрини шумо шароит муҳайё аст?
- Бештари тамринҳоямон дар “кӯли Ҷавонон”- и шаҳри Душанбе мегузарад. Инчунин дар дарёи Вахш, ва Искандаркӯл низ тамрин мекунем, вале дар он ҷойҳо шароит он қадар хуб нест. Об ҳасту шароит барои тамрин вуҷуд надорад. 

Ҷамшеди Мирзо: Федератсияи қайиқронии кишвар барои рушди ин соҳа чӣ корҳоро анҷом дода истодааст?
- Федератсия то ҳадди имкон барои варзишгарон кӯмак намуда истодааст. Федератсия ҳаракат дорад,  ки қайиқронӣ дар кишвар то дараҷаи байналмиллалӣ рушд  ёбад. Баъзе мушкилот то ҳол ҷой дораду фикр мекунам, ки дар ояндаи наздик ҳалли худро меёбанд.  

Ситора Малакбозова: Ҳамсафари ҳаётиатонро чигуна дидан мехоҳед?
- Ман  бонуеро ҳамсари худ дидан мехоҳам, ки хулқу одоб ва фарҳанги тоҷикона дошта бошаду аз ҳама муҳим маро дарк кунад. Дар оилае, ки якдилию ҳамдигарфаҳмӣ ҳукмрон аст, дар он фарзандон ҷисман ва руҳан солим тарбия ёфта, ба камол мерасанд ва чунин оиларо метавон оилаи хушбахт номид. Ҳамдигарфаҳмӣ оиларо аз муноқишаҳои беҳуда ва вайроншавӣ эмин нигоҳ дошта, дари хушбахтиро ба рӯи навхонадорон боз мекунад. 

Гулноза Валиева: Айни замон ба кадом мусобиқа тайёрӣ дида истодаед?
- Айни ҳол барои чемпионати Ҷаҳон, ки 20-24 август дар давлати Маҷористон баргузор мегардад,  барои ба даст овардани роҳхат ба бозиҳои Токио 2020 талош хоҳам кард. Дар ин мусобиқа тамоми кушишамро ба харҷ медиҳам, то роҳхатро ба даст оварам. Зеро ягона орзуи ман ин роҳхатро ба даст овардан ва бори дигар Тоҷикистонро дар сатҳи байналмиллалӣ дар чемпионати ҷаҳон муаррифӣ кардан аст. Ман тӯли чанд вақт аст, ки дар давлати Маҷористон қарор дорам, машқу тамринҳои мо дар ин давлат гузашта  ва барои ширкат дар ин мусобиқа омодагӣ дида истодаем. 

Муҳаммад Даминов: Ягона орзуе ки то ҳол амалӣ нагаштааст?
- Ягона орзуям ин баланд бардоштани Парчами давлатӣ дар бозиҳои тобистонаи олимпӣ мебошад. То бозиҳои олимпӣ як соли дигар мондааст ва барои роҳхат гирифтан ба олимпиадаи 2020, ки дар Токио баргузор мегардад, талош мекунам.


Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
28 29 30 31 1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 1

Ноябр 2019 c.